ക്രെഡിറ്റ് കാർഡാണോ ബൈ നൗ പേ ലേറ്റർ ആണോ മികച്ചത്?; ബിഎൻപിഎല്ലിനെ കുറിച്ച് കൂടുതൽ അറിയാം

വളരെ കുറച്ച് നാളുകൾ കൊണ്ട് ജനപ്രീതി നേടിയ ഒന്നാണ് ബൈ നൗ പേ ലേറ്റർ അഥവാ ബിഎൻപിഎൽ. യുവാക്കൾക്കിടിയിലാണ് ഇത് കൂടുതൽ പ്രചാരത്തിലുള്ളത്. പർച്ചേസിംഗുകളിൽ പലിശ രഹിത കാലയളവിനുള്ളിൽ പണം നൽകിയാൽ മതിയെന്നതിനാൽ തന്നെ ഉപഭോക്താക്കൾ ഏറ്റവും അധികമായി ഉപയോഗിക്കുന്ന ക്രെഡിറ്റ് മാർഗ്ഗമായി മാറി. ചില ബാങ്കുകളും ഫിൻടെക് സ്ഥാപനങ്ങളും ഇത്തരം സംവിധാനം ഉപഭോക്താക്കൾക്കായി അവതരിപ്പിച്ചു കഴിഞ്ഞു. ഉപയോഗിക്കുമ്പോൾ ഇവ ക്രെഡിറ്റ് കാർഡ് തന്നെയാണെന്ന് തോന്നാം. എന്നാൽ ഇതിൽ നിന്നും ചില വ്യത്യാസങ്ങളുണ്ട്. ഫീസ്, പ്രൊസസിംഗ് ചാർജ്, പലിശ രഹിത കാലയളവ്, ക്രെഡിറ്റ് ഓഫറുകൾ എന്നിങ്ങനെയുള്ള ഘടകങ്ങളെല്ലാം തന്നെ രണ്ടിലും വ്യത്യസ്തമാണ്. ഇവ ഏത് തരത്തിലെന്ന് നോക്കാം…

ഫീസ്

ബിഎൻപിഎൽ തിരഞ്ഞെടുക്കുമ്പോൾ ഉപഭോക്താക്കൾ ഇതിനായി പ്രത്യേകം ഫീസ് ഒന്നും തന്നെ നൽകേണ്ടതില്ല. എന്നാൽ നിങ്ങളുടെ കയ്യിലുള്ളത് ക്രെഡിറ്റ് കാർഡ് ആണെങ്കിൽ ഇവയ്‌ക്ക് പ്രൊസസിംഗ് ഫീസ്, ജോയിനിംഗ് ഫീസ്, വാർഷിക ഫീസ് എന്നിങ്ങനെ വിവിധ തരത്തിലുള്ള ചാർജുകൾ ഈടാക്കിയേക്കാം.

പ്രവർത്തനം

ക്രെഡിറ്റ് കാർഡുകളുടെ പ്രവർത്തനം ബിഎൻപിഎല്ലിനെ അപേക്ഷിച്ച് കുറച്ചു കൂടി സങ്കീർണമാണ്. ക്രെഡിറ്റ് സ്‌കോർ, മറ്റ് ഫിനാൻഷ്യൽ സ്റ്റേറ്റ്‌മെന്റുകൾ, തിരിച്ചറിയൽ രേഖകൾ എന്നിവയെല്ലാം തന്നെ ഉപഭോക്താവ് സമർപ്പിക്കേണ്ടതുണ്ട്. എന്നാൽ ബിഎൻപിഎൽ ആണെങ്കിൽ കെവൈസി കൃത്യമായി നൽകിയാൽ മതിയാകും.

പലിശ നിരക്ക്

ക്രെഡിറ്റ് കാർഡുകളെ അപേക്ഷിച്ച് ബിഎൻപിഎല്ലിന് പലിശ നിരക്ക് താരതമ്യേന കുറവാണ്. ഇതിന് പുറമേ ഉപഭോക്താക്കൾക്ക് 10 മുതൽ 30 ദിവസം വരെയും മറ്റ് അധിക ചാർജുകൾ ഒന്നും തന്നെയില്ലാതെ പലിശ രഹിത കാലയളവും ലഭ്യമാകുന്നു. എന്നാൽ ക്രെഡിറ്റ് കാർഡിൽ പലിശനിരക്ക് ഈടാക്കുന്നത് ഇതിൽ നിന്നും ചെലവാക്കിയ തുകയ്‌ക്ക് അനുസൃതമായാണ്.

ക്രെഡിറ്റ് ലിമിറ്റ്

ആർബിഐയുടെ നിർദ്ദേശാനുസരണം 60,000 രൂപയ്‌ക്ക് മുകളിൽ ബിഎൻപിൽ സൗകര്യം ലഭ്യമല്ല. എന്നാൽ ക്രെഡിറ്റ് കാർഡിന് ഇത്തരത്തിൽ ബാധകമില്ല. ക്രെഡിറ്റ് പരിധി നിശ്ചയിക്കുന്നത് ഉപഭോക്താവിന്റെ മുമ്പുള്ള ഇടപാടുകളെ അനുസരിച്ചാകും.