ന്യൂഡൽഹി: മലയാളി താരം രോഹൻ കുന്നുമ്മലിനെ ട്രയൽസിന് ക്ഷണിച്ച് ഡൽഹി ക്യാപിറ്റൽസ്. ആഭ്യന്തര ക്രിക്കറ്റിലെ മികച്ച പ്രകടനമാണ് ഐപിഎൽ ടീമായ ഡൽഹി ക്യാപിറ്റൽസ് താരത്തെ ട്രയൽസിന് ക്ഷണിക്കാൻ കാരണം. ആഭ്യന്തര ഏകദിന ടൂർണമെന്റായ ദിയോദർ ട്രോഫിയിൽ ദക്ഷിണമേഖലക്കായി മിന്നും പ്രകടനമാണ് രോഹൻ നടത്തിയത്. 62.20 ശരാശരിയിൽ 311 റൺസുമായി ടൂർണമെന്റിലെ മൂന്നാമത്തെ ഉയർന്ന റൺവേട്ടക്കാരനായി മാറിയിരുന്നു താരം. റിയാൻ പരാഗ്(354), മായങ്ക് അഗർവാൾ(341) എന്നിവർ മാത്രമാണ് രോഹന് മുന്നിലുളളത്. ഈസ്റ്റ് സോണിനെതിരായ ഫൈനലിൽ ഓപ്പണറായി ഇറങ്ങി 75 പന്തിൽ 107 റൺസടിച്ച രോഹന്റെ മികവിലാണ് ടീം കിരീടം നേടിയത്.
ടൂർണമെന്റിൽ 123.90 എന്ന മികച്ച സ്‌ട്രൈക്ക് റേറ്റിൽ പ്രകടനം കാഴ്ച വയ്‌ക്കാനും രോഹനായി. 136.67 സ്‌ട്രൈക്ക് റേറ്റുളള റിയാൻ പരാഗാണ് രോഹനെക്കാൾ മുന്നിലുള്ള ഏക ബാറ്റർ. ഇതിന് പിന്നാലെയാണ് 25കാരനായ രോഹനെ തേടി ഡൽഹി ക്യാപിറ്റൽസിൽ നിന്നും വിളിയെത്തിയത്. ഡൽഹി ക്യാപിറ്റൽസിന്റെ പരിശീലന ക്യാമ്പിൽ തന്നെ കാത്തിരുന്നത് വളരെ മികച്ച അനുഭവമായിരുന്നുവെന്നും സൗരവ് ഗാംഗുലി, പ്രവീൺ ആംറേ തുടങ്ങിയവരുമായി സംസാരിക്കാൻ കഴിഞ്ഞെന്നും രോഹൻ പറഞ്ഞു.
അവർ തന്റെ ബാറ്റിംഗിലെ പോരായ്മകൾ ചൂണ്ടിക്കാണിച്ചുവെന്നും തെറ്റുകൾ തിരുത്തി തന്നുവെന്നും രോഹൻ പറയുന്നു. സൗരവ് ഗാംഗുലി അടക്കമുള്ള ലെജന്റ്‌സിന്റെ ഉപദേശങ്ങൾ പോരായ്മകളെ മാറ്റി നിർത്തികൊണ്ട് മികച്ച പ്രകടനം കാഴ്ച വെയ്‌ക്കാൻ തന്നെ സഹായിക്കുമെന്നും താരം കൂട്ടിച്ചേർത്തു.
