തൃശൂർ: ഭാരതസ്വാതന്ത്ര്യത്തിന്റെ അമൃത മഹോത്സവത്തോടനുബന്ധിച്ചുള്ള അണുബോധവത്കരണ യാത്ര തൃശൂരിലെത്തി. യാത്രയുടെ ഭാഗമായി ഇരിഞ്ഞാലക്കുട ക്രൈസ്റ്റ് കോളേജിൽ നടന്ന പരിപാടി IGCAR അസോസിയേറ്റ് ഡയറക്ടർ ഡോ. കിത്തേരി ജോസഫ് ഉദ്ഘാടനം ചെയ്തു. കോളേജ് പ്രിൻസിപ്പൽ ഡോ. ജോളി ആൻഡ്രൂസ് അദ്ധ്യക്ഷനായ ചടങ്ങിൽ IGCAR മേധാവി ജലജ മദൻമോഹൻ, സ്വദേശി സയൻസ് മൂവ്മെന്റിന്റെ ഭാഗമായി ടി എം നന്ദകുമാർ, ഫാദർ ജോയ് പീനിക്കാപ്പറമ്പിൽ, ഡോ. സുധീർ സെബാസ്റ്റ്യൻ എന്നിവർ സംസാരിച്ചു.
ആറ്റംസ് ഇൻ ദി സർവീസ് ഓഫ് നാഷൻ എന്ന ആശയം മുന്നോട്ട് വെച്ച് നടത്തിയ പരിപാടിയിൽ നിരവധി വിദ്യാർത്ഥികൾ പങ്കെടുത്തു. വിദ്യാർത്ഥികളുടെ അവബോധത്തിനായി ജിയോളജി, കെമിസ്ട്രി, ഫിസിക്സ് വിഭാഗങ്ങളുടെ നേതൃത്വത്തിൽ എക്സിബിഷനും സംഘടിപ്പിച്ചു.
ന്യൂക്ലിയർ സയൻസ്, ടെക്നോളജി എന്നിവയിൽ അവബോധം സൃഷ്ടിക്കുകയാണ് അണുബോധവത്കരണ യാത്രയുടെ ലക്ഷ്യം. യുവജനങ്ങൾക്കിടയിൽ ആണവോർജ വകുപ്പിന്റെ പ്രവർത്തനങ്ങൾ ഉയർത്തിക്കാട്ടുന്ന ബോധവത്കരണ യാത്ര കേരളത്തിലെയും തമിഴ്നാട്ടിലെയുമടക്കം വിവിധ വിദ്യാഭ്യാസ സ്ഥാപനങ്ങളിൽ ഇതിനോടകം നടന്നു കഴിഞ്ഞു. ഇന്ദിരാഗാന്ധി സെന്റർ ഫോർ ആറ്റോമിക് റിസർച്ച്, കേന്ദ്ര സംസ്കാരിക മന്ത്രാലയം, വിജ്ഞാൻ ഭാരതി, NCSM എന്നിവയുടെ നേതൃത്വത്തിലാണ് യാത്ര സംഘടിപ്പിച്ചിരിക്കുന്നത്.
