ചന്ദ്രയാൻ മൂന്ന് ചാന്ദ്രോപരിത്തലത്തിൽ സോഫ്റ്റ് ലാൻഡിംഗ് നടത്തുമെന്ന് ആത്മവിശ്വാസം പ്രകടിപ്പിച്ച് ഐഎസ്ആർഒ ചെയർമാൻ എസ്.സോമനാഥ്. ചന്ദ്രയാൻ-3 ന്റെ ലാൻഡറായ വിക്രമിന്റെ സെൻസറുകളും രണ്ട് എഞ്ചിനുകളും പ്രവർത്തിക്കുന്നില്ലെങ്കിൽ പോലും സോഫ്റ്റ് ലാൻഡിംഗ് നടത്താൻ കഴിയുമെന്ന് അദ്ദേഹം പറഞ്ഞു. പരാജയങ്ങളെ അതിജീവിക്കാൻ കഴിയും വിധമാണ് വിക്രം ലാൻഡർ രൂപകൽപ്പന ചെയ്തിരിക്കുന്നതെന്ന് അദ്ദേഹം വ്യക്തമാക്കി. പ്രൊപ്പൽഷൻ സിസ്റ്റം നന്നായി പ്രവർത്തിക്കാനായി പഴുതടച്ച രീതിയിലാണ് നിർമ്മിച്ചിരിക്കുന്നതെന്ന് എസ് സോമനാഥ് പറഞ്ഞു.
ചന്ദ്രയാൻ 3 സുരക്ഷിതമായി ചാന്ദ്രോപരിത്തലത്തിൽ ഇറങ്ങുമോ എന്ന് സംശയം പ്രകടിപ്പിക്കുന്നവർക്കും ആശങ്കപ്പെടുന്നവർക്കുമുള്ള മറുപടിയാകും ഇസ്രോ ചെയർമാന്റെ ഈ വാക്കുകൾ. ചന്ദ്രന്റെ ഉപരിതലവും മറ്റും പഠിക്കാൻ അയച്ചിരിക്കുന്ന പേടകം ഭംഗിയായി തന്നെ ദൗത്യം പൂർത്തികരിക്കുമെന്ന് വിശ്വസിക്കാം. പേടകത്തിന്റെ നാലാം ഭ്രമണപഥം താഴ്ത്തൽ പ്രക്രിയയും വിജയകരമായി പൂർത്തികരിച്ചതായി ഐഎസ്ആർഒ വ്യക്തമാക്കി. ഇതോടെ ചന്ദ്രനും പേടകവും തമ്മിലുള്ള അകലം കേവലം 177 കിലോമീറ്റർ മാത്രമാണ്.
പരിക്രമണ ഘട്ടം വിജയകരമായി പൂർത്തീകരിച്ച് അന്തിമ ലക്ഷ്യസ്ഥാനത്തേക്ക് ചന്ദ്രയാൻ 3 അടുക്കുകയാണ്. ഇനി പേടകം ചന്ദ്രന് അടുത്ത് വൃത്താകൃതിയിലുള്ള ഭ്രമണപഥത്തിലെത്തും. തുടർന്ന് 17-നാണ് ലാൻഡറും റോവറും ഉൾപ്പെടുന്ന ലാൻഡിംഗ് മൊഡ്യൂൾ പ്രൊപ്പൽഷൻ മൊഡ്യൂളിൽ നിന്ന് വേർപ്പെടുക. ശേഷം ഇതിന് 30 കിലോമീറ്റർ അകലെയുള്ള ചന്ദ്രന്റെ സമീപം സ്ഥിതി ചെയ്യുന്ന പെരിലൂൺ എന്ന് ഭ്രമണപഥത്തിലേക്ക് പേടകത്തെ എത്തിക്കും. ഇവിടെ നിന്നായിരിക്കും സോഫ്റ്റ് ലാൻഡിംഗിനുള്ള പ്രവർത്തനങ്ങൾ തുടങ്ങുക. ഓഗസ്റ്റ് 23-നാകും ഇത്.
