സാൻ ഫ്രാൻസിസ്കോ: ബഹിരാകാശ ടൂറിസം രംഗത്ത് ചുവടുറപ്പിച്ച് വെർജിൻ ഗലാക്ടിക്. വാണിജ്യാടിസ്ഥാനത്തിലുള്ള ആദ്യത്തെ ബഹിരാകാശ യാത്ര വിജയകരമായി പൂർത്തിയാക്കിയിരിക്കുകയാണ് വെർജിൻ ഗലാക്ടിക്. വിഎസ്എസ് യൂണിറ്റി എന്ന ബഹിരാകാശ വിമാനമാണ് യാത്രക്കാരുമായി കഴിഞ്ഞ ദിവസം ബഹിരാകാശത്തേക്ക് പറന്നത്. ഗലാക്ടിക്കിന്റെ ഏഴാം ദൗത്യമാണിതെങ്കിലും ഇതുവരെയുള്ളതെല്ലാം പരീക്ഷണപ്പറക്കലുകളായിരുന്നു.
വെർജിൻ ഗലാക്ടിക്കിന്റെ കാരിയർ വിമാനം വിഎസ്എസ് യൂണിറ്റിയെ 13.5 കിലോമീറ്റർ അതയാത് 44,300 അടി വരെ എത്തിക്കുകയും അവിടെ നിന്ന് യൂണിറ്റി സ്വന്തം റോക്കറ്റ് ഉപയോഗിച്ച് ബഹിരാകാശ പരിധിയിൽ 88.51 കിലോമീറ്റർ ഉയരത്തിലെത്തുകയുമാണ് ചെയ്തത്. ഭാരക്കുറവുൾപ്പെടെയുള്ള ബഹിരാകാശ അനുഭവവും അവിടെ നിന്നുള്ള ഭൂമിയുടെ കാഴ്ചയുമാണ് സഞ്ചാരികൾക്ക് ആസ്വദിക്കാനാവുക.
ആറ് യാത്രികരിൽ മൂന്ന് പേരായിരുന്നു സ്വകാര്യസഞ്ചാരികൾ. അമ്മയും മകളും ഒരുമിച്ചു നടത്തുന്ന ആദ്യത്തെ ബഹിരാകാശയാത്ര എന്നതും ഈ യാത്രയുടെ പ്രത്യേകതയായിരുന്നു. 2.5 ലക്ഷം മുതൽ 4.5 ലക്ഷം ഡോളർ അതായത് 3.73 കോടി രൂപ വരെയാണ് ടിക്കറ്റ് നിരക്ക്. ബഹിരാകാശ യാത്രയ്ക്കായി എണ്ണൂറോളം പേരാണ് റജിസ്റ്റർ ചെയ്ത് കാത്തിരിക്കുന്നത്.
