പുത്തൻ മേക്കോവറിൽ എത്തിയിരിക്കുകയാണ് റെയിൽവേയുടെ സ്വന്തം വന്ദേ ഭാരത്. ഓറഞ്ച്-ഗ്രേ നിറത്തിലുള്ള വന്ദേ ഭാരതാണ് ഇന്ത്യൻ റെയിൽവേ പുറത്തിറക്കിയത്. ചെന്നൈയിലെ ഇൻറഗ്രൽ കോച്ച് ഫാക്ടറിയിൽ നിർമ്മിച്ച ട്രെയിൻ രാജ്യത്തെ 31-ാമത്തെ വന്ദേ ഭാരതാണ്. ഉടൻ തന്നെ ഈ ട്രെയിൻ ട്രാക്കിലിറങ്ങുമെന്നാണ് റിപ്പോർട്ട്.
പുത്തൻ കളർ തീമിലുള്ള വന്ദേ ഭാരതിന്റെ ഒരു റേക്ക് മാത്രമാണ് ആദ്യഘട്ടത്തിൽ നിർമ്മിക്കുന്നത്. പുറംഭാഗത്താണ് പുത്തൻ വ്യത്യാസമെങ്കിലും ട്രെയിന് ഉള്ളിലെ കാഴ്ചകൾക്ക് അത്രമാത്രം വ്യത്യാസമില്ല. എന്നാൽ വന്ദേ ഭാരതിന്റെ പുതിയ ബാച്ചിൽ വരുത്തിയിട്ടുള്ള 25 സവിശേഷതകൾ ഓറഞ്ച്-ഗ്രേ കളറിലും അവതരിപ്പിച്ചിട്ടുണ്ട്.
സീറ്റുകൾ കൂടുതൽ പിന്നിലേക്ക് ചായിക്കാനുള്ള സൗകര്യം, മെച്ചപ്പെട്ട കുഷ്യനുകൾ, എക്സിക്യൂട്ടീവ് ചെയർ കാറിലെ ഫൂട്ട് റെസ്റ്റിന്റെ നീളം, നീല നിറത്തിലുള്ള സീറ്റുകൾ, ടോയ്ലറ്റുകളിലെ വാഷ് ബേസിനിൽ വരുത്തിയ മാറ്റങ്ങൾ, മെച്ചപ്പെട്ട മൊബൈൽ ചാർജിംഗ് പോയിന്റുകൾ എന്നിവ സജ്ജമാക്കിയിട്ടുണ്ട്.തീപിടിത്തം തിരിച്ചറിയാനും അണയ്ക്കാനുമുള്ള സംവിധാനത്തിന്റെ ഗുണനിലവാരവും വർദ്ധിപ്പിച്ചു. നിലവിലെ വന്ദേ ഭാരത് ട്രെയിനിൽ സീറ്റുകളിൽ ചുവപ്പ് നിറമാണ് നൽകിയിരുന്നതെങ്കിൽ ഓറഞ്ച് റേക്കിൽ ഇറങ്ങുന്ന സെമി ഹൈസ്പീഡ് ട്രെയിനിൽ നീല നിറമാണ് നൽകിയിരിക്കുന്നത്.
വീൽചെയറുകൾക്ക് ഫിക്സിങ് പോയിൻറുകൾ, എളുപ്പത്തിൽ ഉപയോഗിക്കുന്നതിന് റെസിസ്റ്റീവ് ടച്ചിൽ നിന്ന് കപ്പാസിറ്റിവ് ടച്ചിലേക്ക് റീഡിങ് ലാമ്പിന്റെ മാറ്റം, മെച്ചപ്പെട്ട റോളർ ബ്ലൈൻഡ്, ടോയ്ലറ്റുകളിലെ ലൈറ്റുകൾ 1.5 വാട്ടിൽ നിന്ന് 2.5 വാട്ടായി ഉയർത്തി, വാട്ടർ ടാപ്പുകളിൽ എയറേർ, അടിയന്തര ഘട്ടങ്ങളിൽ ഉപയോഗിക്കാനുള്ള ഹാമർ ബോക്സ് കവറിലെ മാറ്റങ്ങൾ തുടങ്ങിയവയാണ് പുത്തൻ വന്ദേ ഭാരതിൽ യാത്രക്കാർക്കായി വരുത്തിയിരിക്കുന്ന മാറ്റങ്ങൾ.
