യൂട്യൂബിൽ പാട്ട് സെർച്ച് ചെയ്ത് കണ്ടെത്തുക എന്നത് വളരെ എളുപ്പമുള്ള കാര്യമാണെങ്കിലും വരികൾ അറിയാത്ത പാട്ടാണെങ്കിൽ ഇത്തിരി പാടു പെടും. ഇതിനായി മറ്റാരുടെയെങ്കിലും സഹായം തേടേണ്ടതായി വരാറുണ്ട്. എന്നാൽ ഇനി മുതൽ എളുപ്പത്തിൽ തന്നെ യൂട്യൂബിൽ നിന്ന് പാട്ട് കണ്ടെത്താനാകും. യൂട്യൂബ് അവതരിപ്പിക്കാൻ പോകുന്ന പുതിയ ഫീച്ചറിലൂടെ പാട്ടിന്റെ ഒരു ഭാഗം മൂളി ഏതാണെന്ന് കണ്ടെത്താനാകും.
ഗൂഗിൾ സപ്പോർട്ട് പേജിലൂടെയാണ് പുതിയ ഫീച്ചർ സംബന്ധിച്ച വിവരങ്ങൾ പുറത്തു വിട്ടിരിക്കുന്നത്. വരികൾ ശരിയായ രീതിയിൽ അറിയില്ലെങ്കിൽ പോലുംപാട്ടേതെന്ന് കണ്ടെത്താൻ ഇനി ഈ ഫീച്ചർ നിങ്ങളെ സഹായിക്കും. ഏത് പാട്ടും നിഷ്പ്രയാസം കണ്ടെത്തുന്നതിനാണ് യൂട്യൂബ് പുതിയ ഫീച്ചർ അവതരിപ്പിക്കുന്നത്.
നിലവിൽ ആൻഡ്രോയിഡ് ഫോണുകളിലുള്ള ആപ്പുകളിൽ മാത്രമാണ് ഈ സേവനം ലഭ്യമാകുക. സാധാരണയായി ഒരു പാട്ട് സെർച്ച് ചെയ്യുന്നതിന് മൂന്ന് സെക്കൻഡോ അതിൽ കൂടുതലോ ദൈർഘ്യമുള്ള ഓഡിയോ നൽകേണ്ടതുണ്ട്. നിലവിൽ ആൻഡ്രോയിഡ് ഫോണുകളിൽ യൂട്യൂബ് ബീറ്റ വേർഷൻ ഉപയോഗിക്കുന്ന ചില ആളുകൾക്ക് മാത്രമേ ഈ ഫീച്ചർ ലഭ്യമാവുകയുള്ളു. ഈ ഫീച്ചർ പരീക്ഷിച്ച് കഴിഞ്ഞാൽ വൈകാതെ തന്നെ സ്റ്റേബിൾ വേർഷനിലും ലഭ്യമാക്കും.
എവിടെയെങ്കിലും പ്ലേ ചെയ്തുകൊണ്ടിരിക്കുന്ന ഒരു പാട്ട് റെക്കോർഡ് ചെയ്തോ അല്ലെങ്കിൽ സ്വന്തമായി മൂളിയോ യൂട്യൂബിൽ പാട്ട് സെർച്ച് ചെയ്യാനാകും. പാട്ട് തിരിച്ചറിഞ്ഞു കഴിഞ്ഞാൽ യൂട്യൂബ് ആപ്പിൽ സെർച്ച് ചെയ്ത പാട്ട് ഫീച്ചർ ചെയ്യുന്ന മ്യൂസിക്ക് കണ്ടന്റിലേക്കും ഇതുമായി ബന്ധപ്പെട്ട വീഡിയോകളിലേക്കും ആക്സസ് ലഭിക്കും. ഈ സെർച്ച് റിസൾട്ടിൽ ഷോർട്ട്സുകളും ഉണ്ടായിരിക്കും.
