ലോക ബാഡ്മിന്റൺ ചാമ്പ്യൻഷിപ്പിൽ മലയാളി താരം എച്ച് എസ് പ്രണോയ് സെമി ഫൈനലിൽ. നിലവിലെ ലോക ചാമ്പ്യൻ ഡെൻമാർക്കിന്റെ വിക്ടർ അക്സെൽസനെയാണ് താരം പരാജയപ്പെടുത്തിയത്.
ആദ്യ സെറ്റിന് ശേഷമാണ് പ്രണോയ് മത്സരത്തിലേയ്ക്ക് തിരിച്ചു വന്നത്. പ്രണോയ്ക്ക് മേൽ വെല്ലുവിളി ഉയർത്താൻ രണ്ടും മൂന്നും സെറ്റിൽ വിക്ടർ അക്സെൽസന് സാധിച്ചില്ല. സ്കോർ: 13-21, 21-15, 21-16. ഫൈനൽ ബെർത്ത് ഉറപ്പിക്കാൻ പ്രണോയ് ഇന്ന് സെമി ഫൈനൽ പോരാട്ടത്തിനിറങ്ങും . മത്സരത്തിൽ തായലൻഡ് താരമാണ് പ്രണോയിയുടെ എതിരാളി.
മുൻ ലോക ചാമ്പ്യൻ ലോക് കീൻ യൂവിനെയാണ് പ്രീക്വാർട്ടറിൽ പ്രണോയ് അട്ടിമറിച്ചത്. മൂന്ന് ഗെയിമുകൾ നീണ്ട ഉശിരൻ പോരാട്ടത്തിൽ 21-18, 15-21, 21-19 എന്ന സ്കോറിനായിരുന്നു പ്രണോയിയുടെ വിജയം.
അതേസമയം, പുരുഷ ഡബിൾസിൽ ഇന്ത്യയുടെ സ്വാതിക് സായ്രാജ് രെങ്കിറെഡ്ഡി- ചിരാഗ് ഷെട്ടി സഖ്യം ക്വാർട്ടർ ഫൈനലിൽ കടന്നു. എഡിഷനിലെ വെങ്കലം നേടിയ സഖ്യം ഇന്തോനേഷ്യയുടെ ലിയോ റോളി കർണാണ്ടോ- ഡാനിയൽ മാർട്ടിൻ സഖ്യത്തെ തോൽപ്പിച്ചാണ് മെഡൽ പ്രതീക്ഷ സജീവമാക്കിയത്.
വനിതാ വിഭാഗത്തിൽ ഇന്ത്യയുടെ ട്രീസ ജോളി- ഗായത്രി ഗോപിചന്ദ് സഖ്യം ക്വാർട്ടർ കാണാതെ പുറത്തായി. പ്രീ ക്വാർട്ടറിൽ ചൈനയുടെ ലോക ഒന്നാം നമ്പർ താരങ്ങളായ ചെൻ ക്വിംഗ് ചെൻ- ജിയാ യി ഫാൻ സഖ്യത്തോട് നേരിട്ടുള്ള ഗെയിമുകൾക്കായിരുന്നു തോൽവി.
Comments