പാട്ട് പാടാൻ ഇഷ്ടമുള്ളവർക്കായി പുതിയ ഫീച്ചർ അവതരിപ്പിച്ച് യൂട്യൂബ്. പാട്ട് കേൾക്കുന്നതിനായി നിലവിൽ ഉപയോക്താക്കളെല്ലാം ഉപയോഗിച്ച് വരുന്നത് യൂട്യൂബ് മ്യൂസിക്ക് ആപ്പാണ്. വലിയൊരു മ്യൂസിക് കളക്ഷനാണ് ഇതിലൂടെ ഉപയോക്താക്കൾക്ക് ലഭ്യമാകുന്നത്. എളുപ്പത്തിൽ സെർച്ച് ചെയ്ത് കണ്ടെത്താനും മികച്ച ക്വാളിറ്റിയിൽ തന്നെ പ്ലേ ചെയ്യാനും സാധിക്കും എന്നതാണ് ഇതിന്റെ സവിശേഷത. ഇപ്പോഴിതാ ഈ ആപ്ലിക്കേഷനിലാണ് കൂടുതൽ ഫീച്ചറുകൾ പുതുതായി ഉൾപ്പെടുത്തിയിരിക്കുന്നത്. പാട്ട് പാടുന്നവർക്ക് ഉപകാരപ്രദമാകുന്ന തരത്തിലുള്ള ഫീച്ചറാണ് പുതിയതായി ആപ്പിൽ ഉൾപ്പെടുത്തിയിരുന്നത്.
യൂട്യൂബ് മ്യൂസിക്കിൽ പാട്ടുകൾ പ്ലേ ചെയ്യുമ്പോൾ തന്നെ ഇനി മുതൽ പാട്ടിന്റെ വരികളും എഴുതി കാണിക്കും. മ്യൂസിക് സ്ട്രീമിംഗ് ആപ്പിന്റെ ആൻഡ്രോയിഡ്, ഐഒഎസ് ആപ്പുകളിൽ ഈ പുതിയ ഫീച്ചർ ഇനി മുതൽ ലഭ്യമാകും. ലൈവ് ലിറിക്സ് ഫീച്ചർ ഉപയോഗിച്ച് പ്ലേ ചെയ്യുന്ന പാട്ടിന്റെ വരികൾ സ്ക്രീനിൽ കാണിക്കുന്നതിനൊപ്പം തന്നെ ഏത് വരിയാണോ പാടുന്നത് അത് വെള്ള നിറത്തിൽ ഹൈലൈറ്റ് ചെയ്ത് കാണിക്കും. ബാക്കി വരികൾ മങ്ങിയ ചാരനിറത്തിലാകും കാണിക്കുക.
യൂട്യൂബ് മ്യൂസിക്കിന്റെ ഏറ്റവും പുതിയ പതിപ്പിലേക്ക് അപ്ഡേറ്റ് ചെയ്യുന്നതോടെ ഈ സേവനം ലഭ്യമാകും. നിലവിൽ ഇന്ത്യ ഉൾപ്പെടെയുള്ള രാജ്യങ്ങളിൽ 2020 മുതൽ സ്പോട്ടിഫൈയിൽ ഈ സേവനം ലഭ്യമാണ്.
