ഐശ്വര്യത്തിന്റെയും സമ്പൽ സമൃദ്ധിയുടെയും ഒരു പൊന്നോണക്കാലം കൂടി വന്നിരിക്കുകയാണ്. കേരളക്കരയാകെ ഓണം ആഘോഷിക്കുന്ന തിരക്കിലാണ്. ഓണക്കോടി എടുത്തും, പൂക്കളമിട്ടും, സദ്യ ഒരുക്കിയും നമ്മൾ മാവേലി തമ്പുരാനെ വരവേൽക്കാനായുള്ള ഉത്രാടപാച്ചിലിലാണ്. തിരക്കിലാണെങ്കിലും സദ്യയിൽ വിട്ടുവീഴ്ചകൾ ഒന്നും നമ്മൾ വരിത്തിലെന്ന കാര്യം നിശ്ചയമാണ്. വീടുകളിൽ മാത്രമല്ല ക്ഷേത്രങ്ങളിലും ഓണസദ്യ ഒരുക്കുന്നുണ്ട്. വിശ്വാസികൾക്കായി ഓണസദ്യ നൽകുന്ന ക്ഷേത്രങ്ങൾ ഏതെന്ന് അറിയാം..
തൃക്കാക്കര ക്ഷേത്രം
കേരളത്തിലെ ഏറ്റവും കൂടുതൽ ഓണാഘോഷങ്ങൾ നടക്കുന്ന ക്ഷേത്രമാണ് എറണാകുളത്തെ തൃക്കാക്കര ക്ഷേത്രം. ഇവിടുത്തെ ഓണസദ്യ പ്രസിദ്ധമാണ്. ഇവിടെ മഹാബലിയെയും വാമനനെയും ഒരു പോലെ ആരാധിക്കുന്ന ഒരു കൂട്ടം ജനതയാണുള്ളത്. അതുപോലെ ക്ഷേത്രത്തിന് തൊട്ടടുത്തുള്ള ശിവക്ഷേത്രത്തിൽ മഹാബലി ആരാധിച്ച സ്വയംഭൂ ശിവലിംഗവും കാണാം. ഉത്രാടം, തിരുവോണം ദിവസങ്ങളിലാണ് ക്ഷേത്രത്തിലെത്തുന്ന വിശ്വാസികൾക്കായി വിഭവസമൃദ്ധമായ ഓണസദ്യ നൽകുന്നത്. പപ്പടം, ഉപ്പ്, പരിപ്പ്, സാമ്പാർ, എരിശ്ശേരി, കാളൻ, അവിയൽ, ഓലൻ, പച്ചടി, കിച്ചടി, അച്ചാറുകൾ, ഇഞ്ചിക്കറി, പാലടപ്രഥമൻ എന്നിവയാണ് സദ്യയുടെ വിഭവങ്ങൾ. കൂടാതെ അത്തം തൊട്ടുള്ള പത്ത് ദിവസങ്ങളിൽ ക്ഷേത്രത്തിൽ മുടങ്ങാതെ പൂക്കളം ഇട്ടു വരുന്നആചാരവും നില നിൽക്കുന്നുണ്ട്.
ഗുരുവായൂർ
തൃക്കാക്കര കഴിഞ്ഞാൽ ഏറ്റവും അധികം ആളുകൾ ഓണ സദ്യ കഴിക്കുന്നതിനായി എത്തി ചേരുന്നത് ഉണ്ണിക്കണ്ണന്റെ അടുത്താണ്. തിരുവോണ ദിവസമാണ് കണ്ണന് ഓണപ്പുടവ സമ്മാനിക്കുന്ന ചടങ്ങ്. രാവിലെ പത്തുമണിക്കാണ് സദ്യ. ചോറ്, ഓലൻ, കാളൻ,ഒഴിച്ചു കറി,എലിശ്ശേരി, പപ്പടം, അവിയൽ തുടങ്ങി വിഭവ സമൃദ്ധമായ ഓണസദ്യയും പഴപ്രഥമനുമാണ് ഇവിടെ വിശ്വാസികൾക്കായി നൽകുന്നത്.
പത്മനാഭ സ്വാമി ക്ഷേത്രം
ഓണസദ്യ നൽകുന്ന മറ്റൊരു ക്ഷേത്രമാണ് തലസ്ഥാനത്തെ പത്മനാഭ സ്വാമി ക്ഷേത്രം. ഓണത്തിന് പ്രത്യേക ചടങ്ങുകളാണ്ഇവിടെ നിലനിന്നു പോകുന്നത്. വിഭവ സമൃദ്ധമായ സദ്യയും അനന്തശയനത്തിലുള്ള പൂക്കളവുമാണ് ഇവിടെ ഒരുക്കുന്നത്.
വൈക്കം ക്ഷേത്രം
അന്നദാന പ്രഭുവാണ് വൈക്കത്തപ്പൻ. ഓണത്തിന് വിശേഷാൽ പൂജകളാണ് ഇവിടെ നടത്തി വരുന്നത്. ഉത്രാടത്തിനും തിരുവോണത്തിനുമാണ് ഇവിടെ വിഭവ സമൃദ്ധമായ സദ്യ വിശ്വാസികൾക്ക് നൽകി വരുന്നത്.
ശബരിമല
ഓണത്തിന് വിശ്വാസികൾക്കായി സദ്യ ഒരുക്കുന്ന മറ്റൊരു പ്രധാന ക്ഷേത്രമാണ് ശബരിമല. ഉത്രാടം മുതൽ ചതയം വരെ അയ്യപ്പനു മുന്നിൽ ഓണസദ്യ നൽകുന്ന ചടങ്ങ് ഇവിടെ ഉണ്ട്.
