കാഴ്ചകളുടെ ഏഴ് രാപ്പകലുകൾ സമ്മാനിച്ച അനന്തപുരിയുടെ ഓണം വാരാഘോഷം ഇന്ന് കൊടിയിറങ്ങും. സാംസ്കാരിക ഘോഷയാത്രയോടുകൂടി വാരാഘോഷം സമാപിക്കും. സംഗീത, നൃത്ത, വാദ്യഘോഷങ്ങൾ നിറയുന്ന ഘോഷയാത്ര ഗവർണർ ആരിഫ് മുഹമ്മദ് ഖാൻ ഫ്ളാഗ് ഓഫ് ചെയ്യും. വെള്ളയമ്പലം മാനവീയം വീഥിയിൽ വൈകുന്നേരം അഞ്ച് മണിയ്ക്കാണ് ഫ്ളാഗ് ഓഫ് ചടങ്ങ് നടക്കുന്നത്. രാത്രി ഏഴ് മണിയ്ക്ക് കനകക്കുന്ന് നിശാഗന്ധിയിൽ മന്ത്രി മുഹമ്മദ് റിയാസ് സമാപന സമ്മേളനം ഉദ്ഘാടനം ചെയ്യും.
വാദ്യോപകരണമായ കൊമ്പ് മന്ത്രി മുഹമ്മദ് റിയാസ് മുഖ്യ കലാകാരന് കൈമാറുന്നതോടെ താളമേളങ്ങൾക്ക് തുടക്കമാകും. കേന്ദ്ര, സംസ്ഥാന സർക്കാരുകളുടെയും, സർക്കാർ-അർധ സർക്കാർ സ്ഥാപനങ്ങളുടെയും വകുപ്പുകളുടെയും ഫ്ളോട്ടുകൾ ഘോഷയാത്രയിൽ അണിനിരക്കും. മൂവായിരത്തോളം കലാകാരന്മാരാണ് ഇത്തവണ ഘോഷയാത്രയിൽ പങ്കെടുക്കുന്നത്.
ഓഗസ്റ്റ് 27-നാണ് ഓണം വാരാഘോഷത്തിന്റെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയൻ നിർവഹിച്ചത്. തലസ്ഥാനത്തെ ഉത്സവത്തിമിർപ്പിലാക്കിയ ദിവസങ്ങളാണ് കടന്നുപോയ ഏഴ് ദിനരാത്രങ്ങൾ. നിരവധി പേരാണ് ഇത്തവണയും ഓണം വാരാഘോഷത്തിൽ പങ്കെടുക്കാൻ തലസ്ഥാന നഗരിയിലെത്തിയത്.
