കൊളംബോ: ഏഷ്യാ കപ്പിലെ സൂപ്പർ ഫോർ മത്സരങ്ങൾ കനത്ത മഴയ്ക്കുള്ള സാധ്യത നിലനിൽക്കുന്നതിനാൽ കൊളംബോയിൽ നിന്ന് വേദി മാറ്റിയേക്കുമെന്ന് സൂചന. ഫൈനലും അഞ്ച് സൂപ്പർ ഫോർ മത്സരങ്ങളുമാണ് കൊളംബോയിൽ നടക്കുക. ഏഷ്യൻ ക്രിക്കറ്റ് കൗൺസിലാണ് വേദി മാറ്റുന്നത് സംബന്ധിച്ച സൂചനകൾ പുറത്ത് വിട്ടത്. സെപ്റ്റംബർ ഒൻപതിനാണ് സൂപ്പർ ഫോർ മത്സരങ്ങൾ ആരംഭിക്കുന്നത്. സെപ്റ്റംബർ പകുതി വരെ കൊളംബോയിൽ മഴ ശക്തമായുണ്ടാകുമെന്നാണ് റിപ്പോർട്ടുകൾ സൂചിപ്പിക്കുന്നത്.
ശ്രീലങ്ക, പാകിസ്താൻ ക്രിക്കറ്റ് ബോർഡുകളുമായി ചർച്ച ചെയ്തിട്ടാകും ഏഷ്യൻ ക്രിക്കറ്റ് കൗൺസിൽ തീരുമാനമെടുക്കുക. ശ്രീലങ്കയിലെ പല്ലെകെലെ, ദാംബുള്ള, ഹംബൻടോട്ട എന്നിവിടങ്ങളിലായിരിക്കും പകരം മത്സരം നടക്കുക.
എന്നാൽ ചുരുങ്ങിയ സമയംകൊണ്ട് ദാംബുള്ളയിൽ അന്താരാഷ്ട്ര മത്സരം നടത്താനാവില്ലെന്ന് ശ്രീലങ്കൻ ബോർഡ് വ്യക്തമാക്കിയിട്ടുണ്ട്. ഇതോടെ ഏഷ്യാകപ്പിന്റെ വേദിയുടെ കാര്യത്തിൽ ആശങ്ക നിലനിൽക്കുകയാണ്. ഇത്തവണ ഏഷ്യാകപ്പ് പാകിസ്താനിലും ശ്രീലങ്കയിലുമായാണ് നടക്കുന്നത്.
