സ്മാർട്ട്ഫോൺ വിപണിയിൽ ആപ്പിളും ഗൂഗിളും ഏറ്റുമുട്ടുകയാണ്. ഐഫോൺ ലോഞ്ചിന് തീയതി പ്രഖ്യാപിച്ചതിന് പിന്നാലെ ഏറ്റവും പുതിയ പിക്സൽ ഫോണിന്റെ ലോഞ്ച് പ്രഖ്യാപിച്ചിരിക്കുകയാണ് ഗൂഗിൾ. ഗൂഗിൾ പിക്സൽ 8 ഒക്ടോബർ നാലിന് വിപണിയിലെത്തുമെന്നാണ് വിവരം.
‘മെയ്ഡ് ബൈ ഗൂഗിൾ’ എന്നറിയപ്പെടുന്ന ഇവന്റിൽ വെച്ചാകും പുത്തൻ ഫോൺ അവതരിപ്പിക്കുക. ന്യൂയോർക്കിൽ നടക്കുന്ന പരിപാടിയിൽ പിക്സൽ 8-ന് പുറമേ മറ്റ് നിരവധി ഉത്പന്നങ്ങളും ഗൂഗിൾ പുറത്തിറക്കാൻ സാധ്യതയുണ്ട്. രണ്ട് പുതിയ ഫോണുകളാകും ഗൂഗിൾ പുതുതായി പുറത്തിറക്കുക. പിക്സൽ 8, പിക്സൽ 8 പ്രോ എന്നിവയായിരിക്കും ആപ്പിളിന് എതിരാളിയാവുകയെന്നാണ് വിവരം. അടുത്തിടെ പിക്സൽ 8ന്റെ ചിത്രം ഗൂഗിൾ സ്റ്റോർ വെബ്സൈറ്റിൽ പ്രത്യക്ഷപ്പെട്ടിരുന്നെങ്കിലും പിന്നീട് നീക്കം ചെയ്തിരുന്നു. പുറത്തായ ചിത്രം അനുസരിച്ച് പിക്സൽ ഫോണുകൾക്ക് സമാനമായ പിൻ ക്യാമറകളെ മൂടുന്ന രീതിയിലുള്ള ഗ്ലാസ് ഓവർ ഡിസൈനിൽ തന്നെയാകും പിക്സൽ 8 പ്രോയും പുറത്തിറങ്ങുക.
പിക്സൽ 8-നെ കുറിച്ച് നിരവധി അഭ്യൂഹങ്ങളാണ് പ്രചരിക്കുന്നത്. ടിപ്സ്റ്റർ യോഗേഷ് ബ്രാർ പറയുന്നതനുസരിച്ച്, പുതിയ പിക്സൽ ഫോണിൽ 6.7 ഇഞ്ച് QHD+ 120Hz LTPO OLED ഡിസ്പ്ലേ, 11 മെഗാപിക്സൽ സെൽഫി ക്യാമറയ്ക്കായി ഒരു ചെറിയ ഹോൾ-പഞ്ച് കട്ട്ഔട്ട് ഉണ്ട്. പിൻഭാഗത്ത് മൂന്ന് സെൻസറുകൾക്കുള്ള സാധ്യതയുണ്ട്. 50 മെഗാപിക്സൽ പ്രൈമറി ക്യാമറ, 64 മെഗാപിക്സൽ അൾട്രാ വൈഡ്, 49 മെഗാപിക്സൽ ടെലിഫോട്ടോ എന്നിങ്ങനെയുള്ള ക്യാമറയാകും പിക്സൽ 8 നൽകുക. ശരീര താപനില പരിശോധിക്കാൻ ഇൻഫ്രാറെഡ് ടെംപറേച്ചർ സെൻസറും ഫോണിൽ ലഭ്യമാകാനാണ് സാധ്യത.
മികച്ച ബാറ്ററി ശേഷിയോടെയാകും പിക്സൽ 8 പുറത്തിറങ്ങുകയെന്നാണ് വിവരം. 2 4,950mAh ബാറ്ററിയാകും ഫോണിലുണ്ടാവുക. എന്നാൽ ബോക്സിൽ നിന്ന് ചാർജർ ഒഴിവാക്കും. ടിപ്സ്റ്റർ പറയുന്നതനുസരിച്ച്, ടൈറ്റൻ സുരക്ഷാ ചിപ്പ്, 12 ജിബി റാം, 256 ജിബി സ്റ്റോറേജ്, അൾട്രാസോണിക് ഇൻ-ഡിസ്പ്ലേ ഫിംഗർപ്രിന്റ് സ്കാനർ എന്നിവ ഉൾപ്പെടുന്നു. എഐ സാങ്കേതികവിദ്യയിൽ അധിഷ്ഠിതമായ ക്യാമറയാകും പുത്തൻ പിക്സൽ ഫോണിൽ. വീഡിയോയിൽ നിന്ന് പശ്ചാത്തല ശബ്ദം നീക്കം ചെയ്യുന്നതിനായി ഓഡിയോ മാജിക് ഇറേസർ ഫീച്ചറും ലഭിക്കും.
ഫോണുകളുടെ വിലയിലും നേരിയ വർധനയുണ്ടായേക്കും. പിക്സൽ 8 പ്രോ 128GB സ്റ്റോറേജിന് EUR 1,235 (ഏകദേശം 1.10 ലക്ഷം രൂപ) ലും 256 GB -ക്ക് EUR 1,309 (ഏകദേശം 1.16 ലക്ഷം രൂപ) വിലയും പ്രതീക്ഷിക്കുന്നു. ഇന്ത്യയിൽ 84,999 രൂപയ്ക്കാണ് പിക്സൽ 7 പ്രോ അവതരിപ്പിച്ചത്.
