ഐഫോൺ 15-ന് വേണ്ടി പുതിയ തരം കേയ്‌സ് മെറ്റീരിയൽ നിർമിച്ച് ആപ്പിൾ. പുതിയ ഫോണുകൾക്ക് വേണ്ടി പതിവ് മോഡലിലുള്ള ലെതർ കെയ്‌സുകൾ ഇനി പുറത്തു നിർമിക്കുന്നില്ലെന്നാണ് പുറത്തു വരുന്ന വിവരം. എന്നാൽ ലെതർ കെയ്‌സുകളുടെ തന്നെ രൂപഭംഗി ഉള്ള തരത്തിലാകും പുതിയ കേയ്‌സുകൾ. മജിൻബൂഒഫിഷ്യൽ, ഡ്യുവാൻ റുയി എന്നീ ടിപ്പ്സ്റ്റർമാർ ഇത് സംബന്ധിച്ച ചിത്രങ്ങൾ പുറത്തു വിട്ടിട്ടുണ്ട്. ചൈനീസ് സോഷ്യൽ മീഡിയാ പ്ലാറ്റ്‌ഫോമിൽ നിന്നും എടുത്തവയാണ് ഈ ചിത്രങ്ങൾ.
മൃഗത്തൊലികൊണ്ട് ഉപയോഗിച്ചുള്ള ലെതറിന് പകരം കാർബൺ സാന്നിദ്ധ്യം കുറഞ്ഞ പ്രകൃതി സൗഹൃദ പദാർത്ഥങ്ങൾ ഉപയോഗിച്ച് നിർമിച്ച കേയ്‌സുകളാണിത്. എന്നാൽ കേയ്‌സുകൾ സംബന്ധിച്ച് കൂടുതൽ വിവരങ്ങൾ ലഭ്യമല്ല. ലെതർ കെയ്‌സുകൾ ഒഴിവാക്കുന്നതിനായി ആപ്പിൾ പദ്ധതിയിടുന്നതായി മുമ്പും വാർത്ത പുറത്തു വന്നിരുന്നു.
ഫൈൻ വൂവൻ ട്വിൽ എന്ന സാങ്കേതിക വിദ്യയിൽ നിർമിച്ചെടുത്തതാണ് ഈ കെയ്‌സെന്ന് മജിൻ ബു വ്യക്തമാക്കി. ഫൈൻ വൂവൻ കേയ്‌സ് എന്നാണ് ഇതിനെ വിളിക്കുന്നത്. ഇതിന് 8301 രൂപയാണ് വിലയെന്നാണ് പുറത്തു വരുന്ന റിപ്പോർട്ടുകൾ സൂചിപ്പിക്കുന്നത്. 2013-ലാണ് ഐഫോൺ 5 എസിനൊപ്പം ആപ്പിൾ ആദ്യമായി ലെതർ കെയ്‌സുകൾ അവതരിപ്പിക്കുന്നത്.
