പുതിയ വിനിമയ സാങ്കേതികവിദ്യകൾ ഡിജിറ്റൽ യുഗം കീഴടിക്കി കൊണ്ടിരിക്കുകയാണ്. ഇത്തരം വിനിമയ സാങ്കേതികവിദ്യകളുടെ കടന്നുവരവുകൾ കാര്യങ്ങൾ കൂടുതൽ ഫലപ്രദമായി നമ്മെ സഹായിക്കുന്നു. ഇതിനോടനുബന്ധിച്ച് ഉപയോക്താക്കൾക്ക് യുപിഐ വഴി പ്രീ സാങ്ഷൻഡ് ക്രെഡിറ്റ് ലൈനുകൾ നൽകാൻ ബാങ്കുകൾക്ക് അനുമതി നൽകിയിരിക്കുകയാണ് റിസർവ് ബാങ്ക്. എന്താണ് യുപിഐ പ്രീ സാങ്ഷൻ ക്രെഡിറ്റ് ലൈൻ , അറിയാം വിശദവിവരങ്ങൾ..
ക്രെഡിറ്റ് കാർഡിനു സമാനമായാണ് യുപിഐ പ്രീ സാങ്ഷൻ ക്രെഡിറ്റ് ലൈൻ പ്രവർത്തിക്കുക. അക്കൗണ്ടിൽ പണം ഇല്ലെങ്കിലും ഉപഭോക്താക്കൾക്ക് ബാങ്കുകൾ നൽകുന്ന വായ്പ പ്രയോജനപ്പെടുത്താൻ സാധിക്കുമെന്നതു തന്നെയാണ് ഇതിന്റെ ഏറ്റവും വലിയ പ്രത്യേകത. അതിനോടൊപ്പം ഈ ക്രെഡിറ്റ് ഉപയോഗിച്ച് യുപിഐ പണമിടപാടുകൾ നടത്താനും സാധിക്കും. നിലവിൽ ക്രെഡിറ്റ് കാർഡുകൾ, സേവിംഗ്സ് അക്കൗണ്ടുകൾ, ഓവർഡ്രാഫ്റ്റ് അക്കൗണ്ടുകൾ, പ്രീപെയ്ഡ് വാലറ്റുകൾ എന്നിവ യുപിഐയുമായി ബന്ധിപ്പിക്കാൻ ഉപഭോക്താക്കൾക്ക് സാധിക്കും. ക്രെഡിറ്റ് കാലാവധി, പലിശ നിരക്ക്, തുടങ്ങിയ കാര്യങ്ങൾ ബാങ്കുകൾക്ക് നേരിട്ട് തീരുമാനിക്കാവുന്നതാണ്. പുതിയ സംവിധാനത്തിലൂടെ യുപിഐ പണമിടപാടുകൾ വിപുലീകരിക്കാനാണ് റിസർവ് ബാങ്കിന്റെ നീക്കം.
