കൊളംബോ: ഏകദിന ക്രിക്കറ്റിൽ 10000 റൺസ് തികച്ച് ഇന്ത്യൻ നായകൻ രോഹിത് ശർമ്മ. ഏഷ്യാകപ്പിലെ ഇന്ത്യ- ശ്രീലങ്ക പോരാട്ടത്തിനിടെയാണ് താരം ഈ റെക്കോർഡ് നേട്ടത്തിലെത്തിയത്. 10000 റൺസ് തികയ്‌ക്കുന്ന ഇന്ത്യൻ താരങ്ങളുടെ പട്ടികയിലേക്ക് ഇതോടെ താരമെത്തി. ശ്രീലങ്കയ്‌ക്കെതിരായ മത്സരത്തിൽ വ്യക്തിഗത സ്‌കോർ 22-ൽ എത്തിയപ്പോഴാണ് താരം ഈ നേട്ടം സ്വന്തമാക്കിയത്.
അന്താരാഷ്‌ട്ര ക്രിക്കറ്റിൽ ഈ നേട്ടം സ്വന്തമാകുന്ന 15-മത് താരവും രോഹിതാണ്. വിരാട് കോഹ്ലി കഴിഞ്ഞാൽ ഏറ്റവും വേഗത്തിൽ 10000 റൺസ് തികയ്‌ക്കുന്ന രണ്ടാമത്തെ ഇന്ത്യൻ താരമെന്ന നേട്ടവും ഇന്ത്യൻ നായകൻ ഇതോടെ സ്വന്തമാക്കി.
2018-ൽ വിശാഖപട്ടണത്ത് വെസ്റ്റിൻഡീസിനെതിരായ മത്സരത്തിൽ തന്റെ 205-ാം ഇന്നിംഗ്സിലാണ് കോലി 10,000 ക്ലബ്ബിൽ അംഗമാകുന്നത്. രോഹിത്തിന് ഈ നേട്ടത്തിലെത്താൻ 241 ഇന്നിംഗ്‌സുകൾ വേണ്ടിവന്നു. 2001-ൽ 259 ഇന്നിംഗ്‌സുകളിൽ നിന്ന് ഈ നേട്ടത്തിലെത്തിയ സച്ചിൻ തെണ്ടുൽക്കറുടെ റെക്കോഡ് മറികടന്നാണ് രോഹിത്തിന്റെ നേട്ടം.
