ഏഷ്യാകപ്പ് ഫൈനലിന് തൊട്ടുമുന്‍പ് വരെ മത്സരം ഇന്ത്യയ്‌ക്ക് എളുപ്പമാകില്ലെന്നും ശ്രീലങ്ക വലിയ വെല്ലുവിളിയാകുമെന്നും പറഞ്ഞിരുന്ന പാകിസ്താന്റെ മുന്‍ താരം ഷോയ്ബ് അക്തര്‍ ഏഷ്യാകപ്പില്‍ ഇന്ത്യ കിരീടം ചൂടിയതിന് പിന്നാലെ പ്ലേറ്റ് മറിച്ചു.ഏഷ്യാ കപ്പില്‍ ഇന്ത്യ ഇത്ര വലിയ വിജയം നേടും എന്ന് പ്രതീക്ഷിച്ചിരുന്നില്ല എന്ന് പറഞ്ഞ മുന്‍താരം നായകന്‍ രോഹിത് ശര്‍മ്മയെയും പ്രശംസിച്ചു.
ഇവിടം മുതല്‍ ഇന്ത്യ ലോകകപ്പിലെ ഏറ്റവും അപകകാരികളായ ടീമാകുമെന്നും റാവല്‍പിണ്ടി എക്‌സ്പ്രസ് പറഞ്ഞു. തന്റെ യൂട്യൂബ് ചാനലിലൂടെയായിരുന്നു താരത്തിന്റെ പ്രതികരണം.
”ഇവിടെ മുതല്‍, ഇന്ത്യ ലോകകപ്പിലെ ഏറ്റവും അപകടകരമായ ടീമായിരിക്കും. പക്ഷേ മറ്റു ടീമുകളെയും ഞാന്‍ എഴുതിത്തള്ളുന്നില്ല.”സിറാജിന്റെ ബൗളിംഗ് ഗംഭീരമായിരുന്നു, നിങ്ങള്‍ ഇന്ത്യയുടെ വിജയത്തിന് സഹായിച്ചു. നിങ്ങളുടെ സമ്മാനത്തുക ഗ്രൗണ്ട് സ്റ്റാഫിന് നല്‍കിക്കൊണ്ട് നിങ്ങള്‍ ഒരു മികച്ച പ്രവര്‍ത്തിയാണ് ചെയ്തത്”-അക്തര്‍ പറഞ്ഞു.
”വര്‍ദ്ധിച്ച ആത്മവിശ്വാസവും ആയാകും ഇന്ത്യ ലോകകപ്പിന് ഇറങ്ങുക. ഇന്ത്യ പാകിസ്താന്റെ മാത്രമല്ല, മറ്റ് പല രാജ്യങ്ങളുടെയും ആശങ്കയാണെന്ന് എനിക്ക് തോന്നുന്നു.”ഷോയ്ബ് കൂട്ടിച്ചേര്‍ത്തു.
