തിരുവനന്തപുരം: കേരളത്തിൽ നിന്നും കൊൽക്കത്തയിൽ എത്തിയ യുവാവിനെ നിപ രോഗ ലക്ഷണങ്ങളെ തുടർന്ന് ആശുപത്രിയിൽ പ്രവേശിപ്പിച്ചു. നിലവിൽ കൊൽക്കത്തയിലെ ബെല്ലാഘട്ട ഐഡി ആശുപത്രിയിൽ യുവാവ് നിരീക്ഷണത്തിലാണ്. കേരളത്തിൽ ജോലി ചെയ്തിരുന്ന ബർദ്വാൻ സ്വദേശിയെയാണ് ആശുപത്രിയിൽ പ്രവേശിപ്പിച്ചിരിക്കുന്നത്.
കടുത്ത പനിയും ഛർദ്ദിയും അനുഭവപ്പെട്ടതിനെ തുടർന്ന് യുവാവ് ആശിപത്രിയിൽ ചികിത്സ തേടുകയായിരുന്നു. പരിശോധനയിൽ തൊണ്ടിൽ അണുബാധയുള്ളതായും കണ്ടെത്തിയിട്ടുണ്ട്. അതേസമയം കടുത്ത പനിയെ തുടർന്ന് ഇയാൾ എറണാകുളത്തെ ആശുപത്രിയിൽ ചികിത്സ തേടിയിരുന്നതായി ആരോഗ്യ വകുപ്പ് അധികൃതർ വ്യക്തമാക്കി. ഇവിടെ നിന്നും ഡിസ്ചാർജ് ചെയ്തതിന് ശേഷമാണ് ഇയാൾ പശ്ചിമബംഗാളിലേക്ക് മടങ്ങിയത്.
വീണ്ടും കടുത്ത പനി അനുഭവപ്പെട്ടതിനെ തുടർന്നാണ് വീണ്ടും ആശുപത്രിയിൽ പ്രവേശിപ്പിച്ചിരിക്കുന്നത്. ഇയാൾ നിരീക്ഷണത്തിൽ തുടരുകയാണെന്നും പരിശോധനകൾ തുടരുന്നുണ്ടെന്നും അധികൃതർ അറിയിച്ചു.
Comments