ചന്ദ്രന്റെ ദക്ഷിണധ്രുവത്തിൽ സ്ഥിതി ചെയ്യുന്ന ഷാക്കിൾടൺ ഗർത്തത്തിന്റെ ചിത്രം പകർത്തി നാസയുടെ പേടകം. ചന്ദ്രനെ വലം വെക്കുന്ന പേടകമായ ‘ലൂണാർ റെക്കണൈസൻസ് ഓർബിറ്റർ’ പകർത്തിയ ചിത്രമാണ് നാസ പുറത്തുവിട്ടത്. ഇതിൽ ഘടിപ്പിച്ചിരിക്കുന്ന ലൂണാർ റെക്കണൈസൻസ് ഓർബിറ്റർ ക്യാമറ (എൽആർഒസി), ഷാഡോക്യാം എന്നിവയാണ് മനം കവരുന്ന മൊസൈക്ക് ചിത്രം പകർത്തിയത്.
ചന്ദ്രന്റെ ദക്ഷിണധ്രുവത്തിലെ അഭൂതപൂർവ്വമായ വിവരങ്ങളാണ് ചിത്രം വെളിപ്പെടുത്തുന്നത്. ഹൈ റെസല്യൂഷനിൽ വ്യത്യസ്ത ആംഗിളിൽ നിന്ന് ചിത്രങ്ങൾ പകർത്തുന്നതിനായി മൂന്ന് ക്യാമറകളാണ് എൽആർഒയിൽ ഘടിപ്പിച്ചിരിക്കുന്നത്. ചന്ദ്രോപരിത്തലത്തിന്റെ ആകാശ കാഴ്ച ക്യാമറയിൽ പകർത്തിയിരുന്നു. കറുപ്പ്, വെളുപ്പ്, ചാര നിറങ്ങളിൽ ഉപരിതലത്തിലെ ചിത്രങ്ങൾ പകർത്തിയിരുന്നു.
ലൈറ്റ് സെൻസിറ്റിവിറ്റി അധികമുള്ള ഷാഡോക്യാമിൽ പകർത്തിയ ചിത്രത്തിൽ നിഴലിക്കുന്ന പ്രദേശങ്ങൾ, ഗർത്തത്തിന്റെ പ്രതലം, ഭിത്തികൾ എന്നിവ വളരെ വ്യക്തമായി ദൃശ്യമാണ്. എൽആർഒസി ശേഖരിച്ച ചിത്രങ്ങളെ ഒന്നിപ്പിച്ചതിന്റെ ആകെ തുകയാണ് മൊസൈക്ക് ചിത്രത്തിൽ വെളിച്ചമുള്ള ഭാഗങ്ങൾ. ഒരു നിശ്ചിത പാറ്റേണിൽ കളിമണ്ണ്, ഗ്ലാസ്, അല്ലെങ്കിൽ മറ്റ് വസ്തുക്കളെ ക്രമീകരിച്ച് ഒരു വലിയ ചിത്രം സൃഷ്ടിക്കുന്നതിനെയാണ് മൊസൈക്ക് ചിത്രമെന്ന് പറയുന്നത്.
View this post on Instagram
‘മൂൺലൈറ്റ് സൊണാറ്റ’ എന്ന അടിക്കുറിപ്പോടെയാണ് നാസ ചിത്രം പങ്കുവെച്ചത്. ചന്ദ്രനെ പരിക്രമണം ചെയ്യുന്ന ക്യാമറകളുടെ ശക്തി വെളിപ്പെടുത്തുന്ന മൊസൈക്ക് ചിത്രങ്ങളാണിത്. കൊറിയൻ എയ്റോസ്പേസ് റിസർച്ച് ഇൻസ്റ്റിറ്റ്യൂട്ടുമായി കൈകോർത്ത് നാസ വികസിപ്പിച്ച ഉപകരണമാണ് എൽആർഒസിയും ഷാഡോക്യാമും. ഇവ രണ്ടും സംയുക്തമായി പകർത്തിയ ചിത്രങ്ങളാണ് സമൂഹമാദ്ധ്യമങ്ങളിൽ വൈറലാകുന്നത്.
