മനാമ: സ്ത്രീകൾക്കായി കിംസ് ഹെൽത്ത് മെഡിക്കൽ സെന്ററുമായി ചേർന്ന് ബഹറിനിലെ പ്രമുഖ സംഘടനയായ 973 ലോഞ്ച് ‘കെയർ ഫോർ ഹെർ’ എന്ന പേരിൽ സൗജന്യ മെഡിക്കൽ പ്രിവേജ് കാർഡ് അവതരിപ്പിച്ചു. കഴിഞ്ഞ ദിവസം കിംസ് ഹെൽത്ത് ഓഡിറ്റോറിയത്തിൽ വെച്ചാണ് ചടങ്ങ് നടന്നത്. കിംസ് ഹെൽത്ത് ജി.സി.സി ഓപ്പറേഷൻ ആൻഡ് പ്രോജക്ട് വിഭാഗം ഗ്രൂപ്പ് എക്സിക്യൂട്ടീവ് ഡയറക്ടർ ശ്രീ ജേക്കബ് തോമസ് കാർഡുകൾ 973 ലോഞ്ചിന്റെ സ്ഥാപകരായ രാജി ഉണ്ണികൃഷ്ണൻ, റിതിൻ രാജ്, എന്നിവർക്ക് കൈമാറി.
ഗൈനക്കോളജി, ഓഫ്താൽമോളജി എന്നീ വിഭാഗങ്ങളിൽ സൗജന്യ കൺസൾട്ടേഷൻ വാഗ്ദാനം ചെയ്യുന്ന ‘കെയർ ഫോർ ഹെർ’ കാർഡിനെയും അതിന്റെ മറ്റ് പ്രത്യേകതകളെയും കുറിച്ചും റിതിൻ രാജ് ചടങ്ങിൽ സംസാരിച്ചു. ഈ കാർഡിന് ആരൊക്കെയാണ് അർഹർ, എങ്ങനെയാണ് കാർഡിന്റെ ഉപയോഗം എന്നതെല്ലാം രാജി ഉണ്ണികൃഷ്ണൻ വിശദീകരിച്ചു. എല്ലാ മാസവും അർഹരായ 10 വനിതകൾക്കാണ് ഈ കാർഡ് വിതരണം ചെയ്യുക.
പ്രവാസി ലീഗൽ സെൽ ബഹറിൻ ചാപ്റ്റർ സംഘടിപ്പിച്ച ‘കണക്റ്റിംഗ് പീപ്പിൾ’ എന്ന പരിപാടിയോട് ചേർന്നാണ് ‘കെയർ ഫോർ ഹെർ’ കാർഡ് അവതരിപ്പിച്ചത്. ഇന്ത്യൻ അംബാസിഡർ ശ്രീ വിനോദ് കെ ജേക്കബ്, ബഹറിൻ പാർലമെന്റ് അംഗം ഡോക്ടർ ഹസൻ ബുഖാമസ്, ബഹറിൻ മിനിസ്ട്രി ഓഫ് ലേബർ ഗൈഡൻസ് ആൻഡ് അവയർനസ് വിഭാഗം തലവൻ ഹുസൈൻ അൽ ഹുസൈനി, ശ്രീലങ്കൻ അംബാസഡർ ശ്രീമതി വിജെരത്നെ മെൻഡിസ്, നേപ്പാൾ എംബസി, ബംഗ്ലാദേശ് ഉദ്യോഗസ്ഥർ തുടങ്ങിയവർ പരിപാടിയിൽ പങ്കെടുത്തു.