ദുബായ്: യുഎഇയിൽ ഇന്ന് രാത്രി മുതൽ മഴ പെയ്യുമെന്ന് കാലാവസ്ഥാ നിരീക്ഷണകേന്ദ്രം. വെള്ളിയാഴ്ച്ച രാവിലെ വരെ പരക്കെ മഴ പെയ്യുമെന്നാണ് മുന്നറിയിപ്പ്. ദുബായിലും ഷാർജയിലും സ്കൂളുകളിൽ നാളെയും മറ്റന്നാളും പഠനം ഓൺലൈനിലേക്ക് മാറ്റിയിട്ടുണ്ട്.
ദുബായ് മെട്രോ രണ്ട് ദിവസം പ്രവർത്തനസമയം അഞ്ച് മണിക്കൂർ നീട്ടി പുലർച്ചെ അഞ്ചുവരെയാക്കി. വിമാനയാത്രക്കാരുടെ സൗകര്യം കണക്കിലെടുത്താണ് ഇത്. ജീവനക്കാർക്ക് വർക്ക് ഫ്രം ഹോം സ്വീകരിക്കാനും അവസരം ഉണ്ട്.
പടിഞ്ഞാറൻ ഭാഗത്ത് നിന്ന് ആരംഭിക്കുന്ന മഴ നാളെ രാജ്യം മുഴുവൻ ശക്തമാകുമെന്നാണ് മുന്നറിയിപ്പ്. പലയിടങ്ങളിലും മഴയ്ക്കൊപ്പം ശക്തമായ കാറ്റിനും സാധ്യത പ്രവചിക്കുന്നു. കൂടാതെ ഇടിമിന്നലും ആലിപ്പഴ വർഷവുമുണ്ടായേക്കാമെന്നും മുന്നറിയിപ്പുണ്ട്. പൊടിക്കാറ്റിൽ കാഴ്ചപരിധി കുറയുമെന്നും വാഹനയാത്രക്കാർ ശ്രദ്ധിക്കണമെന്നും പൊലീസ്
മുന്നറിയിപ്പ് നൽകുന്നു.
ഷാർജയിൽ പാർക്കുകൾ അടച്ചിടും. എമിരേറ്റിൽ നാളെയും മറ്റന്നാളും നടക്കേണ്ട എല്ലാ കായിക പരിപാടികളും പിൻവലിച്ചതായി ഷാർജ സ്പോർട്സ് കൗൺസിലും അറിയിച്ചു.
കഴിഞ്ഞ മാസം പെയ്തതുപോലെ അതിശക്ത മഴ ഇത്തവണ ഉണ്ടാകില്ലെന്നും ജനങ്ങൾ ആശങ്കപ്പെടേണ്ട സാഹചര്യമില്ലെന്നും ദേശിയ കാലാവസ്ഥാ നിരീക്ഷണകേന്ദ്രം വ്യക്തമാക്കിയിട്ടുണ്ട്. പ്രതികൂല കാലാവസ്ഥയിൽ നൽകുന്ന സുരക്ഷാ മാർഗ നിർദേശങ്ങൾ പാലിക്കണമെന്ന് ആഭ്യന്തര മന്ത്രാലയം അഭ്യർഥിച്ചു. വിവരങ്ങൾക്ക് ഔദ്യോഗിക സ്രോതസ്സുകളെ മാത്രം ആശ്രയിക്കണമെന്നും അധികൃതർ ആവശ്യപ്പെട്ടു.
