ന്യൂഡൽഹി: 19-ാമത് ഏഷ്യൻ ഗെയിംസിൽ രാജ്യത്തിനായി മെഡൽ നേടിയ താരങ്ങളെ അഭിനന്ദിച്ച് പ്രധാനമന്ത്രി നരേന്ദ്രമോദി. വനിതാ ക്രിക്കറ്റ് ടീമിനും ഷൂട്ടിംഗിലും തുഴച്ചിലിലും ഉൾപ്പെടെ വിവിധ വിഭാഗങ്ങളിലായി മെഡൽ നേടിയവരെയുമാണ് പ്രധാനമന്ത്രി എക്സിലൂടെ അഭിനന്ദിച്ചത്. 2 സ്വർണം, 3 വെള്ളി, 6 വെങ്കലവുമുൾപ്പെടെ 11 മെഡലുകളുകളാണ് ഏഷ്യൻ ഗെയിംസിലെ ഇന്ത്യയുടെ ഇതുവരെയുളള സമ്പാദ്യം.
വനിതാ ക്രിക്കറ്റ് ടീം അംഗങ്ങൾക്ക് അഭിനന്ദനങ്ങൾ! അരങ്ങേറ്റ ഏഷ്യൻ ഗെയിംസിലാണ് നിങ്ങളുടെ ഈ സുവർണ വിജയം. മനോഹരമായ പ്രകടനമാണ് ടീം കാഴ്ചവെച്ചത്. ടീമിന്റെ മുന്നോട്ടുളള യാത്രകൾക്ക് ആശംസകൾ. 10 മീറ്റർ എയർ റൈഫിൾ പുരുഷവിഭാഗം ടീമിനത്തിൽ രുദ്രാങ്ക്ഷ് പാട്ടീൽ, ദിവ്യാൻഷ് പൻവാർ, ഐശ്വരി പ്രതാപ് തോമർ എന്നിവർ ഒരു ലോക റെക്കോർഡ് സ്ഥാപിച്ചാണ് ഏഷ്യൻ ഗെയിംസിൽ സ്വർണം നേടിയത്. ഈ മെഡൽ നേട്ടം രാജ്യത്തിന് അഭിമാനമാണ്. – പ്രധാനമന്ത്രി എക്സിൽ കുറിച്ചു.
ഏഷ്യൻ ഗെയിംസിൽ 10 മീറ്റർ എയർ റൈഫിൾ വനിതാ- പുരുഷ വിഭാഗങ്ങളിൽ മെഡൽ നേടിയവർക്ക് അഭിനന്ദനങ്ങൾ. റമിതാ ജിൻഡാൽ, ഐശ്വരി പ്രതാപ് സിംഗ് തോമർ എന്നിവരുടെ വെങ്കലമെഡലുകളിൽ രാജ്യം അഭിമാനിക്കുന്നു. അസാധാരണമായ കഴിവിന്റെയും നിശ്ചയദാർഢ്യത്തിന്റെയും ഫലമാണിത്. നിങ്ങളുടെ മുന്നോട്ടുളള യാത്രക്ക് ആശംസകൾ. 10 മീറ്റർ എയർ റൈഫിൾ വനിതാ ടീം ഇനത്തിൽ വെള്ളി മെഡൽ നേടിയ റമിത, മെഹുലി ഘോഷ്, ആഷി ചൗക്സി എന്നിവർക്കും 25 മീറ്റർ റാപ്പിഡ് ഫയർ പിസ്റ്റൾ പുരുഷ ടീമംഗങ്ങളായ അനീഷ് ഭൻവാല, വിജയ്വീർ സിദ്ധു, ആദർശ് സിംഗ് എന്നിവർക്ക് ഹൃദയം നിറഞ്ഞ അഭിനന്ദനങ്ങൾ. പ്രധാനമന്ത്രി പോസ്റ്റിൽ കുറിച്ചു.
പുരുഷന്മാരുടെ കോക്സ്ഡ് എയ്റ്റ് വിഭാഗത്തിൽ വെള്ളി നേടിയവർക്കും ലൈറ്റ്വെയ്റ്റ് മെൻസ് ഡബിൾ സ്കൾസ് വിഭാഗത്തിൽ വെള്ളി മെഡൽ നേടിയ അർജുൻ ലാൽ ജാട്ടിനും അരവിന്ദ് സിംഗിനും ഹൃദയം നിറഞ്ഞ അഭിനന്ദനങ്ങൾ. ആശിഷ്, ഭീം സിംഗ്, ജസ്വീന്ദർ സിംഗ്, പുനിത് കുമാർ എന്നിവരടങ്ങിയ പുരുഷന്മാരുടെ കോക്ലെസ് 4 റോവിംഗ് ടീമിന് വെങ്കലം! പുരുഷന്മാരുടെ കോക്സ്ലെസ് വിഭാഗത്തിൽ വെങ്കലം നേടിയ ബാബുലാൽ യാദവും ലേഖ് റാമിനും അഭിനന്ദനങ്ങൾ. നിങ്ങളുടെ വിജയത്തിൽ രാജ്യത്തെ 140 കോടി ജനങ്ങൾ അഭിമാനിക്കുന്നു. വിജയികളെ അഭിനന്ദിച്ച് കൊണ്ട് അദ്ദേഹം ട്വിറ്ററിൽ കുറിച്ചു.
