നായയ്ക്ക് നടക്കാന്‍ അത്ലറ്റുകളെ സ്‌റ്റേഡിയത്തില്‍ നിന്ന് ഒഴിപ്പിച്ച ഐഎഎസ് ഉദ്യോഗസ്ഥയെ സര്‍വീസില്‍ നിന്ന് ഒഴിപ്പിച്ച് കേന്ദ്ര സര്‍ക്കാര്‍. റിങ്കു ദുഗ്ഗയ്‌ക്ക് നിര്‍ബന്ധിത വിരമിക്കല്‍ നിര്‍ദ്ദേശിച്ച സര്‍ക്കാര്‍, ഇതിന്റെ ഉത്തരവും പുറപ്പെടുവിച്ചു. 1994 ബാച്ചിലെ എജിഎംയുടി കേഡര്‍ ഉദ്യോഗസ്ഥയായ റിങ്കു ദുഗ്ഗയെ (54) അരുണാചല്‍ പ്രദേശിലെ തദ്ദേശീയ കാര്യ പ്രിന്‍സിപ്പില്‍ സെക്രട്ടറിയായിട്ടായിരുന്നു നിയമിച്ചിരുന്നത്. ഡല്‍ഹിയിലായിരുന്ന ഇവരെ വിവാദത്തെ തുടര്‍ന്നാണ് അരുണാചലിലേക്ക് മാറ്റിയിരുന്നത്.
ഡല്‍ഹിയിലെ ത്യാഗരാജ് സ്റ്റേഡിയമായിരുന്നു ഐഎഎസ് ദമ്പതികള്‍ അവരുടെ വളര്‍ത്തുനായയ്‌ക്ക് മാത്രമായി വൈകീട്ട് ഏഴ് മണിയോടെ അധികാരം ഉപയോഗിച്ച് ഒഴിപ്പിച്ചെടുത്തിരുന്നത്. സഞ്ജീവ് ഖിര്‍വാറിനും ഭാര്യ റിങ്കു ദുഗ്ഗയ്‌ക്കും വളര്‍ത്തുനായയ്‌ക്കൊപ്പം നടക്കാനായി സ്റ്റേഡിയം 6.45ന് മുന്‍പേ ഒഴിച്ചിടുന്ന പതിവ് ചില പരീശലകരടക്കം സ്ഥിരീകരിച്ചതോടെയാണ് പരാതി പുറത്തുവരുന്നത്.
ഇതിനു പിന്നാലെ സഞ്ജീവ് ഖിര്‍വാറെ ലഡാക്കിലേക്കും റിങ്കു ദുഗ്ഗയെ അരുണാചല്‍ പ്രദേശിലേക്കും സ്ഥലം മാറ്റുകയായിരുന്നു.കഴിഞ്ഞ വര്‍ഷമാണ് തങ്ങളുടെ നായയ്ക്ക് നടക്കാനായി സ്റ്റേഡിയത്തിലെ അത്ലറ്റുകളെ ഒഴിപ്പിച്ചുവെന്ന കേസില്‍ ഇവര്‍ക്കെതിരെ ആരോപണമുയര്‍ന്നത്.
”ദുഗ്ഗയുടെ ട്രാക്ക് റെക്കോര്‍ഡിന്റെ അടിസ്ഥാനത്തില്‍ ഇവര്‍ക്ക് നിര്‍ബന്ധിത വിരമിക്കല്‍ ഉത്തരവ് പുറപ്പെടുവിച്ചു. ഫണ്ടമെന്റല്‍ റൂള്‍സ് (FR) 56(j), 1972 ലെ സെന്‍ട്രല്‍ സിവില്‍ സര്‍വീസസ് (CCS) പെന്‍ഷന്‍ റൂള്‍സ് 48 എന്നിവ പ്രകാരമാണ് ഇവര്‍ വിരമിച്ചതെന്ന് അടുത്ത വൃത്തങ്ങള്‍ പറഞ്ഞു. പൊതുതാല്‍പ്പര്യം മുന്‍നിര്‍ത്തി ഏതൊരു ഉദ്യോഗസ്ഥനെതിരെയും നിര്‍ബന്ധിത വിരമിക്കല്‍ ഉത്തരവ് പുറപ്പെടുവിക്കാന്‍ സര്‍ക്കാരിന് അവകാശമുണ്ട്,” – ഒരു സര്‍ക്കാര്‍ ഉദ്യോഗസ്ഥന്‍ വ്യക്തമാക്കി. അതേസമയം പ്രതികരണത്തിന് ദുഗ്ഗ തയ്യാറായില്ല.
