ചൊവ്വയിലെ ജസെറോ ഗർത്തത്തിൽ പര്യവേഷണ ദൗത്യവുമായി മുന്നോട്ട് നീങ്ങുകയാണ് നാസ. പെർസിവിയറൻസ് റോവറാണ് പര്യവേഷണം നടത്തുന്നത്. പതിവ് പര്യവേഷണ ദൗത്യങ്ങൾക്കിടെയാണ് വ്യത്യസ്ത കാഴ്ച റോവറിന്റെ ശ്രദ്ധയിൽപ്പെടുന്നത്. പൊടി പടലങ്ങൾ വായുവിലൂടെ ഉയർന്ന് പൊങ്ങുകയും ഇത് വലിയൊരു പൊടിച്ചുഴലിയായി രൂപംകൊണ്ട് കിഴക്ക് നിന്നും പടിഞ്ഞാറേക്ക് നീങ്ങുകയും ചെയ്യുന്നു. ഈ പൊടിച്ചുഴലിക്ക് മണിക്കൂറിൽ 19 കിലോമീറ്റർ വേഗതയാണ് ഉണ്ടായിരുന്നത്.
ഈ കഴിഞ്ഞ ഓഗസ്റ്റ് 30-നാണ് പേടകം ഈ രംഗം പകർത്തുന്നത്. കഴിഞ്ഞ ദിവസം നാസ ഇത് പുറത്തു വിടുകയായിരുന്നു. പേടകത്തിലെ നാവ് കാംസ് പകർത്തിയ ചിത്രമാണിത്. ഈ ചിത്രങ്ങൾ ഉപയോഗിച്ച് നാല് സെക്കൻഡ് ദൈർഘ്യമുള്ള 21 ഫ്രെയിം വീഡിയോ നാസ സജ്ജമാക്കിയിട്ടുണ്ട്. പേടകം നിൽക്കുന്നതിന് നാല് കിലോമീറ്റർ അകലെയാണ് പൊടിച്ചുഴലി രൂപപ്പെട്ടത്.
തോറോഫെയർ റിഡ്ജ് എന്ന് വിളിക്കപ്പെടുന്ന ഇടത്താണ് പൊടിച്ചുഴലി രൂപപ്പെട്ടത്. ഏകദേശം 60 മീറ്ററോളം വീതിയിലാണ് ഇതെന്ന കണക്കുകൂട്ടലിലാണ് നാസ. എന്നാൽ വീഡിയോയിൽ പൊടിച്ചുഴലിയുടെ ഏകദേശം 18 മീറ്റർ മാത്രമുള്ള താഴ്ഭാഗമാണ് കാണാനായത്. നിഴലിന്റെ വലിപ്പം പരിശോധിക്കുകയാണെങ്കിൽ രണ്ട് കിലോമീറ്റർ വരെ ഉയരം പൊടിച്ചുഴലിക്കുണ്ടാകുമെന്നാണ് ശാസ്ത്രജ്ഞരുടെ വിലയിരുത്തൽ.
