ഇന്ത്യൻ നായകൻ രോഹിത് ശർമ്മയ്ക്കെതിരെ ബോൾ ചെയ്യാനാണ് തനിക്കേറ്റവും പേടിയെന്ന് തുറന്ന് പറഞ്ഞ് പാകിസ്താൻ വൈസ് ക്യാപ്റ്റൻ ഷദാബ് ഖാൻ. രോഹിത് ശർമ്മയെ ആരാധിക്കുന്ന കോടിക്കണക്കിന് ജനങ്ങളിൽ ഒരാളാണ് ഞാൻ. എന്നാൽ അദ്ദേഹത്തിന് നേരെ ബോൾ ചെയ്യാൻ പേടിയാണെന്നും ഖാൻ പറഞ്ഞു. ഹൈദരാബാദിൽ മാദ്ധ്യമപ്രവർത്തകരോട് സംസാരിക്കുകയായിരുന്നു ഖാൻ.
‘ഞാൻ ഏറ്റവും അധികം ആരാധിക്കുന്ന താരങ്ങളിൽ ഒരാളാണ് രോഹിത് ശർമ്മ. ലോകത്തിലെ മുൻനിര ബാറ്റർമാരുടെ കണക്കെടുത്താൽ അതിൽ മുന്നിലാണ് അദ്ദേഹത്തിന്റെ സ്ഥാനം. ബാറ്റിംഗിൽ താളം കണ്ടെത്തിയാൽ ഏത് ബോളിനെയും നേരിടാനും മറ്റ് ടീമുകൾക്ക് വെല്ലുവിളി ഉയർത്താനും അദ്ദേഹത്തിന് കഴിയും. അതുപോലെ ഇന്ത്യൻ ബൗളർമാരിൽ മറ്റ് ടീമുകൾ പേടിക്കേണ്ടത് കുൽദീപ് യാദവിനെയാണ്. അദ്ദേഹത്തിന്റെ സമീപകാല പ്രകടനം ബാറ്റർമാർക്ക് വെല്ലുവിളി ഉയർത്തും.’- ഖാൻ പറഞ്ഞു.
ഈ ലോകകപ്പിൽ ഏഷ്യാകപ്പിലെ മോശം പ്രകടനം പാകിസ്താൻ തിരുത്തും. ഏറ്റവും മികച്ച ടീമുമായാണ് ലോകകിരീടം നേടാൻ ഇന്ത്യയിൽ എത്തിയിരിക്കുന്നത്. ഏഷ്യാകപ്പിൽ മികച്ച പ്രകടനം പുറത്തെടുക്കാൻ സാധിച്ചില്ല. തെറ്റുകളിലൂടെയാണ് പലകാര്യങ്ങളും പഠിക്കുന്നത്. ഏഷ്യാകപ്പ് തോൽവിക്ക് ശേഷം നല്ല വിശ്രമവും പരിശീലനത്തിനുളള സമയവും ലഭിച്ചു. മാനസികാരോഗ്യത്തിനും ലോകകപ്പിൽ പ്രധാന്യമുണ്ടെന്നും ഷദാബ് ഖാൻ കൂട്ടിച്ചേർത്തു.
