മുംബൈ: ലോകകപ്പിന് മണിക്കൂറുകള് ശേഷിക്കെ ആര് കിരീടം നേടുമെന്ന് പ്രവചിച്ച് രംഗത്തെത്തിയിരിക്കുകയാണ് പ്രമുഖ ജ്യോതിഷിയായ ഗ്രീന്സ്റ്റോണ് ലോബോ. തന്റെ പ്രവചനം ശാസ്ത്രീയമാണെന്നും പിഴിക്കില്ലെന്നും അദ്ദേഹം അവകാശപ്പെടുന്നു. മറ്റെന്നാള് അഹമ്മദാബാദ് നരേന്ദ്ര മോദി സ്റ്റേഡിയത്തിലാണ് ലോകകപ്പിന്റെ ആദ്യമത്സരം. നിലവിലെ ചാമ്പ്യന്മാരായ ഇംഗ്ലണ്ടും റണ്ണറപ്പുകളായ ന്യൂസിലന്ഡുമാണ് ഏറ്റുമുട്ടുന്നത്.
കളിക്കാര് ജനിച്ച വര്ഷവും അവരുടെ ജാതകവും ഗ്രഹനിലയുമെല്ലാം പരിഗണിച്ചാണ് ഗ്രീന്സ്റ്റോണ് ലോബോ പ്രവചനം നടത്തിയിരിക്കുന്നത്.ലോബോയുടെ പ്രവചനം അനുസരിച്ച് ഇത്തവണ ലോകകപ്പ് ജയിക്കാന് സാധ്യതയുള്ളത് 1987ല് ജനിച്ച ക്യാപ്റ്റന്മാരാണ്. 10 ക്യാപ്റ്റന്മാരില് രണ്ടുപേരാണ് ഈ വര്ഷം ജനിച്ചിരിക്കുന്നത്. അതില് ഒന്ന് ബംഗ്ലാദേശ് ക്യാപ്റ്റന് ഷാക്കിബ് അല് ഹസനും മറ്റൊരാള് ഇന്ത്യന് നായകന് രോഹിത് ശര്മ്മയുമാണ്.
താരതമ്യേന ബംഗ്ലാദേശിന്റെ ലോകകപ്പുകളിലെ പ്രകടനം മോശമായതിനാല് ലോക കിരീടം ഉയര്ത്തുന്നത് ഇന്ത്യന് ക്യാപ്റ്റന് രോഹിത് ആയിരിക്കുമെന്ന് ഉറപ്പിച്ച് പറയുകയാണ് ലോബോ. സ്പെയിനിന്റെ യൂറോ കപ്പ് വിജയവും 2011ലെ ഇന്ത്യയുടെ വിശ്വകിരീട നേട്ടവും 2015 ഓസ്ട്രേലിയയുടെ ലോകകപ്പ് വിജയവും താന് പ്രവചിട്ടുണ്ടെന്നാണ് ഇയാളുടെ അവകാശ വാദം.
