ഡൽഹി: 83 ലൈറ്റ് കോംബാറ്റ് എയർക്രാഫ്റ്റ് (എൽസിഎ) മാർക്ക് 1 എ-യ്ക്കായുള്ള കരാറിൽ ഇന്ത്യൻ എയർഫോഴ്സ് ഒപ്പിട്ടുവെന്ന് വ്യോമസേനാ മേധാവി വി.ആർ ചൗധരി. 180 എൽസിഎ മാർക്ക് 1എ ഭാരതത്തിന് ഇന്നുണ്ട്. ഇനി 97 അധിക വിമാനങ്ങൾ കൂടിയാണ് ഐഎഎഫ് ആവശ്യപ്പെട്ടിരിക്കുന്നത്. ഇതിനായി ഏകദേശം 2.5 മുതൽ 3 ലക്ഷം കോടി രൂപ വരുമെന്നും അദ്ദേഹം പറഞ്ഞു. ചൈനയും പാകിസ്താനും സാങ്കേതികവിദ്യകൾ പരസ്പരം കൈമാറുകയാണെന്നും ഇത് കൃത്യമായി തന്നെ ഭാരതം നിരീക്ഷിച്ചു വരുന്നുണ്ടെന്നും വാർത്താ സമ്മേളനത്തിൽ ചൗധരി വ്യക്തമാക്കി.
‘ഞങ്ങൾ കരാർ നൽകിയ അഞ്ച് എസ്-400 പ്രതിരോധ സംവിധാനങ്ങളിൽ മൂന്നെണ്ണം വിതരണം ചെയ്തു കഴിഞ്ഞു. ഇപ്പോൾ നടക്കുന്ന റഷ്യ-യുക്രെയ്ൻ യുദ്ധം ശേഷിക്കുന്ന പ്രതിരോധ സംവിധാനത്തിന്റെ വിതരണത്തിന് തടസ്സം സൃഷ്ടിച്ചിട്ടുണ്ട്. എന്നാൽ, ഒരു വർഷത്തിനുള്ളിൽ ലക്ഷ്യം കൈവരിക്കുമെന്ന് എനിക്ക് ഉറപ്പുണ്ട്. ദീർഘദൂര വ്യോമ പ്രതിരോധ സംവിധാനങ്ങൾക്കായി തദ്ദേശീയമായ പ്രോജക്ട് ഉണ്ട്. മിഗ്-21 യുദ്ധവിമാനം ഉപയോഗിക്കുന്നത് നിർത്തും. 2025-ഓടെ അതിന് പകരം എൽസിഎ തേജസ് വരും. ഇന്റലിജൻസ്, നിരീക്ഷണം, രഹസ്യാന്വേഷണം എന്നിവയിലൂടെ അതിർത്തിക്കപ്പുറത്തുള്ള സ്ഥിതിഗതികൾ ഐഎഎഫ് നിരന്തരം നിരീക്ഷിച്ചു വരികയാണ്’.
‘ഇന്ത്യൻ വ്യോമസേനയുടെ പ്രവർത്തന പദ്ധതികൾ ചലനാത്മകവും സാഹചര്യങ്ങൾക്കനുസരിച്ച് മാറുന്നതുമാണ്. സംഖ്യകളുടെ കാര്യത്തിൽ നമുക്ക് നേരിടാൻ കഴിയാത്ത സ്ഥലങ്ങളിൽ, മികവുറ്റ തന്ത്രങ്ങളിലൂടെ നമ്മൾ മുന്നേറും. ഇൻപുട്ടുകൾക്കനുസരിച്ച് ISR പ്ലാനുകൾ പരിഷ്കരിച്ചുകൊണ്ടിരിക്കുകയാണ്. ഒരു വർഷം മുമ്പുള്ള സ്ഥിതി തന്നെയാണ് ഇന്ത്യാ-ചൈന അതിർത്തിയിൽ ഇപ്പോഴും തുടരുന്നത്. പിരിച്ചുവിടലുകൾ ഉണ്ടായിട്ടുണ്ടെങ്കിലും ഒരിക്കലും പൂർണമായി അതിർത്തിയിൽ നിന്നും നമ്മൾ പിൻവാങ്ങിയിട്ടില്ല’.
‘ചൈനയും പാകിസ്താനും സാങ്കേതികവിദ്യ പരസ്പരം കൈമാറുകയാണ്. പാകിസ്താൻ ജെഎഫ്-17 യുദ്ധവിമാനങ്ങൾ നിർമ്മിക്കുകയും ജെ-10 ഉൾപ്പെടുത്തുകയും ചെയ്യുന്നു. ഈ രണ്ട് രാജ്യങ്ങളും തമ്മിൽ നടക്കുന്ന കൈമാറ്റങ്ങൾ കൃത്യമായി ഞങ്ങൾ നിരീക്ഷിക്കുന്നുണ്ട്. തുർക്കിയും പാകിസ്താനും തമ്മിലുള്ള പങ്കാളിത്തവും പാകിസ്താൻ ധാരാളം ആയുധങ്ങൾ ശേഖരിക്കുന്നതും ഞങ്ങൾ ശ്രദ്ധിക്കുന്നുണ്ട്. ചൈനയുടെ നിയന്ത്രണത്തിലുള്ള പ്രദേശങ്ങൾ വ്യക്തമായി കാണാനും നിരീക്ഷിക്കാനും ദീർഘദൂര പർവത റഡാറുകൾ നിർമ്മിക്കുന്നതിനെപ്പറ്റിയും ആലോചിക്കുന്നുണ്ട്’ എന്ന് വി.ആർ ചൗധരി പറഞ്ഞു.
