കൂടുതല് സുരക്ഷാ ഫീച്ചറുമായി രാജ്യത്തെ ഏറ്റവും വലിയ രണ്ടാമത്തെ വാഹന നിര്മ്മാണ കമ്പനി ആയ ഹ്യൂണ്ടായി. ഇന്ത്യയില് എത്തിക്കുന്ന എല്ലാ മോഡല് കാറുകളിലും ആറ് എയര് ബാഗുകള് ആണ് ഇനി മുതല് ഉണ്ടാവുക. ഇന്ത്യന് റോഡ് ഗതാഗതത്തില് കൂടുതല് സുരക്ഷ ഉറപ്പാക്കുക എന്ന ലക്ഷ്യത്തോടെയാണ് ഈ സുരക്ഷാ ഫീച്ചറുകള് കമ്പനി അവതരിപ്പിച്ചിരിക്കുന്നത്. എല്ലാ മോഡല് കാറുകളിലും ആറ് എയര് ബാഗ് ഉറപ്പാക്കുന്ന ഇന്ത്യയിലെ ആദ്യ വാഹന നിര്മ്മാണ കമ്പനി ആണ് ഹ്യൂണ്ടായി.
ഇന്ത്യയില് എത്തിക്കുന്ന എല്ലാ വാഹനങ്ങളിലും അടിസ്ഥാന വേരിയന്റുകള് മുതലുള്ള മോഡലുകളിലെല്ലാം ഇനിമുതല് ആറ് എയര് ബാഗുകള്
ഉണ്ടാകും. 13 മോഡുകളാണ് ഇതുവരെ കമ്പനി ഇന്ത്യന് നിരത്തുകളില് അവതരിപ്പിച്ചിട്ടുള്ളത്. ഇതില് അവസാനമായി പുറത്തിറക്കിയ എക്സ്റ്റര് ഉല്പ്പെടെയുള്ള ഭൂരിഭാഗം മോഡലുകളിലും ആറ് എയര് ബാഗുകള് ഉള്പ്പെടുത്തിയിട്ടുണ്ട്. ഗ്രാന്റ് ഐ 10 നിയോസ്, ഓറ, വെന്യു തുടങ്ങിയ മോഡലുകളില് വൈകാതെ തന്നെ ഈ സുരക്ഷാ ഫീച്ചര് ഉള്പ്പെടുത്തുമെന്ന് നിര്മ്മാതക്കള് അറിയിച്ചിട്ടുണ്ട്.
കുട്ടികളുടെയും മുതിര്ന്നവരുടെയും വാഹന യാത്രാ സുരക്ഷ കണ്ടെത്തുന്നതിന് നടത്തിയ ഗ്ലോബല് എന് ക്യാപ് ക്രാഷ് ടെസ്റ്റില് ഹ്യുണ്ടായുടെ സെഡാന് മോഡലായ വെര്ണക്ക് ഫൈവ്സ്റ്റാര് റേറ്റിംഗ് ലഭിച്ചിരുന്നു. കൂടാതെ എല്ലാ മോഡല് വാഹനങ്ങളിലും ത്രീ പോയിന്റ് സീറ്റ് ബെല്റ്റും സീറ്റ് ബെല്റ്റ് റിമൈന്ഡറും അവതരിപ്പിച്ചിരുന്നു.
ഇന്ത്യയില് നിര്മിക്കുന്നതും വില്ക്കുന്നതുമായ കാറുകളുടെയും എസ്.യു.വികളുടെയും സുരക്ഷ ഉറപ്പാക്കുന്നതിനായി അടുത്തിടെയാണ് കേന്ദ്ര സര്ക്കാര് ഭാരത് എന്ക്യാപ് ക്രാഷ് ടെസ്റ്റ് പ്രഖ്യാപിച്ചത്. ഇതിലെ മാനദണ്ഡം അനുസരിച്ച് ക്രാഷ് ടെസ്റ്റില് കുറഞ്ഞത് മൂന്ന് സ്റ്റാര് റേറ്റിങ്ങ് ലഭിക്കണമെങ്കില് വാഹനങ്ങളില് ഇലക്ട്രോണിക് സ്റ്റെബിലിറ്റി കണ്ട്രോള് (ഇ.സി.എസ്) നല്കണം. ഹ്യൂണ്ടായി ഭൂരിഭാഗം മോഡലുകളിലും ഇത് നല്കിയിട്ടുണ്ട്.