പെൺകുട്ടികളുടെ വിദ്യാഭ്യാസത്തിന്റെ പ്രധാന്യം, അവരുടെ അവകാശങ്ങൾ, ലിംഗസമത്വം, പോഷകാഹാരം, നിയമപരമായ അവകാശങ്ങൾ എന്നിവ ഉറപ്പാക്കുന്നതിന് വേണ്ടി എല്ലാ വർഷവും ഒക്ടോബർ 11 ന് അന്താരാഷ്ട്ര ബാലികാ ദിനമായി ആചരിക്കുകയാണ്. പെൺകുട്ടികൾ നേരിടുന്ന അവകാശങ്ങളും വെല്ലുവിളികളും തിരിച്ചറിയുന്നതിനായി 2011-ൽ യുഎൻ ജനറൽ അസംബ്ലിയാണ് ഈ ദിനം രൂപീകരിച്ചത്.
അതിർ വരമ്പുകൾ ഇല്ലാതെ വളരുക എന്നത് ഓരോ പെൺകുട്ടികളുടെയും സ്വപ്നമാണ്. ഒരു പെൺകുട്ടി ജനിക്കുന്നത് മുതൽ അവളുടെ വളർച്ചയുടെ ഓരോ കാലഘട്ടത്തിലും സുരക്ഷിതവും ആരോഗ്യകരവും വിദ്യാഭ്യാസപരവുമായ അവകാശങ്ങൾ അവൾക്ക് കിട്ടേണ്ടതുണ്ട്.
ഈ വർഷത്തെ അന്താരാഷ്ട്ര ബാലികാ ദിനത്തിന്റെ ആശയം ‘നമ്മുടെ നേതൃത്വവും ക്ഷേമവും പെൺകുട്ടികളുടെ അവകാശങ്ങളിൽ നിക്ഷേപിക്കുക’ എന്നതാണ്.
1995ൽ, ബെയ്ജിംഗിൽ നടന്ന ലോക വനിതാ സമ്മേളനത്തിൽ സ്ത്രീകളുടെയും പെൺകുട്ടികളുടെയും അവകാശങ്ങൾ മുന്നോട്ട് കൊണ്ടുപോകുന്നതിനുള്ള മാർഗരേഖ കൊണ്ടുവന്നു. രാജ്യങ്ങൾ ഏകകണ്ഠമായി ഈ ബീജിംഗ് പ്രഖ്യാപനവും പ്ലാറ്റ്ഫോമും അംഗീകരിച്ചു. പെൺകുട്ടികളുടെ അവകാശങ്ങൾക്കായുള്ള ആദ്യത്തെ നയമായി ബീജിംഗ് പ്രഖ്യാപനം മാറി. 2011 ഡിസംബർ 19-ന് ഐക്യരാഷ്ട്രസഭയുടെ ജനറൽ അസംബ്ലി 66/170 എന്ന പ്രമേയം അംഗീകരിച്ച് ഒക്ടോബർ 11 അന്താരാഷ്ട്ര ബാലികാ ദിനമായി പ്രഖ്യാപിക്കുകയുണ്ടായി. ആഗോളതലത്തിൽ പെൺകുട്ടികൾ നേരിടുന്ന വെല്ലുവിളികൾ തിരിച്ചറിയാനും അവരുടെ അവകാശങ്ങൾ ഉയർത്താനും ഇതിലൂടെ അവർ ലക്ഷ്യമിടുന്നു.
പെൺകുട്ടികൾക്ക് മികച്ച അവസരങ്ങൾ വർദ്ധിപ്പിക്കേണ്ടതിന്റെയും അവരുടെ ശബ്ദം വർദ്ധിപ്പിക്കുന്നതിന്റെയും പ്രാധാന്യത്തെക്കുറിച്ച് യുഎൻ സെക്രട്ടറി ജനറൽ അന്റോണിയോ ഗുട്ടെറസ് പറഞ്ഞു, ‘സ്ത്രീകൾക്കും പെൺകുട്ടികൾക്കും നമ്മെ മികച്ച ഭാവിയിലേക്ക് നയിക്കാനാകും. ഓരോ പെൺകുട്ടിക്കും നയിക്കാൻ കഴിയുന്ന ഒരു ലോകം കെട്ടിപ്പടുക്കാൻ നമുക്ക് പെൺകുട്ടികളുടെ ശബ്ദമാവാം ഒരുമിച്ച് പ്രവർത്തിക്കാം’.