ഏസർ എന്ന് പേര് കേൾക്കുമ്പോൾ നമുക്ക് കമ്പ്യൂട്ടറുകളും ലാപ്ടോപ്പുകളും മൊബൈൽ ഫോണുകളുമൊക്കെയാകും ഓർമ്മ വരിക. എന്നാൽ വാഹനങ്ങൾ നിർമ്മിക്കുന്നതിലേക്കുള്ള ചുവടുവെപ്പ് കൂടി നടത്തിയിരിക്കുകയാണ് തായ്വാൻ ഇലക്ട്രോണിക്സ് ബ്രാൻഡായ ഏസർ. മുംബൈയിലെ തിങ്ക് ഈബൈക്ക്ഗോ എന്ന ഇവി സ്റ്റാർട്ട് അപ്പ് ആണ് ഏസറിന്റെ മുവി 125 4ജി സ്കൂട്ടർ വികസിപ്പിച്ചെടുത്തിരിക്കുന്നത്. 1 ലക്ഷം രൂപയാണ് ഇതിന്റെ ഷോറൂം വില.
കഴിഞ്ഞ മാസം ഗ്രേറ്റർ നോയിഡയിൽ നടന്ന ഇവി ഇന്ത്യ എക്സ്പോയിൽ വെച്ചാണ് മുവി 125 4ജി ആദ്യമായി പ്രദർശിപ്പിച്ചത്. ഏതൊരു വാഹന പ്രേമികളെയും ആകർഷിക്കുന്ന രീതിയിലാണ് വാഹനം നിർമ്മിച്ചിരിക്കുന്നത്. ലൈറ്റ് വെയ്റ്റ് തന്നെയാണ് വാഹനത്തിന്റെ ഏറ്റവും വലിയ പ്രത്യേകത. ഏറ്റവും പുതിയ ബാറ്ററി സ്വാപ്പബിൾ സാങ്കേതികവിദ്യയാണ് സ്കൂട്ടറിൽ ഉപയോഗിച്ചിരിക്കുന്നതെന്നാണ് കമ്പനിയുടെ വാദം. 48 വാട്ടിന്റെ രണ്ട് ബാറ്ററികളാണ് ഇതിലുള്ളത്. ഒറ്റ ചാർജിംഗിൽ 80 കിലോമീറ്റർ സഞ്ചരിക്കാനും മണിക്കൂറിൽ 75 കിലോമീറ്റർ വേഗത്തിൽ സഞ്ചരിക്കാനും സാധിക്കുമെന്നാണ് ഏസർ മുന്നോട്ട് വെയ്ക്കുന്ന മറ്റൊരു പ്രത്യേകത. നാല് മണിക്കൂറിൽ ബാറ്ററി ഫുൾ ചാർജ് ആകുമെന്നും കമ്പനി പറയുന്നു.
വൃത്താകൃതിയിലുള്ള എൽഇഡി ഹെഡ്ലൈറ്റ്, എൽഇഡി ടേൺ ഇൻഡിക്കേറ്ററുകൾ, സിംഗിൾ പീസ് സീറ്റ് എന്നിവയോടെയാണ് സ്കൂട്ടർ വിപണിയിലിറങ്ങുന്നത്. ഇതിനുപുറമെ ബ്ലൂട്ടൂത്ത് സൗകര്യമുള്ള 4 ഇഞ്ച് എൽഇഡി സ്ക്രീനും ഇതിലുണ്ട്. വെള്ള, ഗ്രേ, കറുപ്പ് തുടങ്ങിയ നിറങ്ങളിലാണ് സ്കൂട്ടർ വിപണിയിലെത്തുന്നത്.
