പ്രായഭേദമന്യേ എല്ലാവർക്കും പ്രിയപ്പെട്ട ഇരുചക്ര വാഹന നിർമ്മാതാക്കളാണ് റോയൽ എൻഫീൽഡിസ്. ബ്രാൻഡിനുള്ള പേരും പെരുമയും കാലങ്ങളോളമായി ഒരേ രീതിയിലാണ് നിലനിൽക്കുന്നത്. മിഡ്-കപ്പാസിറ്റി മോട്ടോർസൈക്കിൾ സെഗ്മെന്റിലേക്ക് മറ്റ് പ്രമുഖ ബ്രാൻഡുകളും കടന്നുവന്ന കാലഘട്ടത്തിൽ പോലും വിൽപന കൂടുന്നതല്ലാതെ റോയൽ എൻഫീൽഡിസിന്റെ വിൽപന കുറഞ്ഞിരുന്നില്ല. അത്രമാത്രം വിശ്വാസമാണ് ബ്രാൻഡിനോട് ജനങ്ങൾക്കുള്ളതെന്ന് ചുരുക്കം.
ബൈക്ക് പ്രേമികൾക്കിടയിൽ ബ്രാൻഡിന് പുതിയ മുഖം നൽകാനൊരുങ്ങുകയാണ് കമ്പനി. ഒടിഒ ക്യാപിറ്റലുമായി സഹകരിച്ച് ‘അഷ്വേർഡ് ബൈബാക്ക് പ്രോഗ്രാം’ (Assured Buyback Program) എന്ന പ്രോഗ്രാമാണ് അവതരിപ്പിച്ചിരിക്കുന്നത്. അഷ്വേർഡ് ബൈബാക്ക് പ്രോഗ്രാം ഉപഭോക്താവിന് തടസരഹിതമായ ഉടമസ്ഥാവകാശമാണ് വാഗ്ദാനം ചെയ്യുന്നത്. മിഡ്-സൈസ് മോട്ടോർ സൈക്കിൾ വിഭാഗത്തെ വളർത്താൻ ലക്ഷ്യമിട്ടാണ് ഈ പദ്ധതി ആവിഷ്കരിച്ചിരിക്കുന്നത്.
ഉപഭോക്താക്കൾക്ക് ഒന്ന് മുതൽ മൂന്ന് വർഷം വരെ നീളുന്ന ഫ്ലെക്സിബിൾ കാലാവധി ഓപ്ഷനുകൾ പ്രോഗ്രാം വാഗ്ദാനം ചെയ്യുന്നു. 45 ശതമാനം വരെ കുറഞ്ഞ ഇഎംഐകൾ, മോട്ടോർസൈക്കിളിന്റെ കാലാവധിയെ ആശ്രയിച്ച് 77 ശതമാനം വരെ ബൈബാക്ക് വാല്യു, ഒപ്പം ക്യാഷ്ബാക്ക് ഇൻസെന്റീവും കാലാവധിയുടെ അവസാനം ലഭിക്കുന്ന വിധമാണ് റോയൽ എൻഫീൽഡ് അഷ്വേർഡ് ബൈബാക്ക് പ്രോഗ്രാം അവതരിപ്പിച്ചിരിക്കുന്നത്. അഷ്വേർഡ് ബൈബാക്ക് കാലാവധി അവസാനിക്കുമ്പോൾ ഉപഭോക്താക്കൾക്ക് ഒന്നിലധികം ഓപ്ഷനുകളും തെരഞ്ഞെടുക്കാനുള്ള അവസരം ഒരുങ്ങും. ഒരു പുതിയ റോയൽ എൻഫീൽഡ് ബൈക്കിനായി മോട്ടോർസൈക്കിൾ ട്രേഡ് ചെയ്യാൻ വരെ ഇതിലൂടെ സാധിക്കും. കമ്പനിക്ക് തന്നെ വാഹനം തിരികെ നൽകാനും അവസരമുണ്ട്.
ഡൽഹി, ഗാസിയാബാദ്, നോയിഡ, ലക്നൗ, ജയ്പൂർ, ഭോപ്പാൽ, ഇൻഡോർ, അഹമ്മദാബാദ്, പൂനെ, ഹൈദരാബാദ്, ബെംഗളൂരു, ചെന്നൈ എന്നിങ്ങനെ 12 നഗരങ്ങളിലെ ഡീലർഷിപ്പുകളിൽ അഷ്വേർഡ് ബൈബാക്ക് പ്രോഗ്രാം ഇപ്പോൾ ലഭ്യമാണ്. കൂടുതൽ നഗരങ്ങളിലേക്ക് വൈകാതെ തന്നെ പദ്ധതി വ്യാപിപ്പിക്കുമെന്ന് കമ്പനി അറിയിച്ചിട്ടുണ്ട്.
