ദുബായ്: യുഎഇയിൽ നടക്കുന്ന മൂന്ന് ദിവസത്തെ സംഗീത ഫെസ്റ്റിവലിന് ഡിസംബറിൽ തുടക്കമാകും. ഡിസംബർ എട്ട് മുതൽ പത്ത് വരെ ദുബായ് മീഡിയ സിറ്റി ആംഫിതീയേറ്ററിലാണ് പരിപാടി സംഘടിപ്പിക്കുന്നത്. 2023 സുസ്ഥിരതാ വർഷമായി ആചരിക്കുന്നതിന്റെ ഭാഗമായാണ് സംഗീത പരിപാടികൾ സംഘടിപ്പിച്ചിരിക്കുന്നത്. യുഎഇ ഏർത്ത് സോൾ ഫെസ്റ്റിവൽ 2023 എന്ന് പേരിട്ടിരിക്കുന്ന സംഗീത പരിപാടിയിൽ കല, ക്രിയേറ്റിവിറ്റി, വിനോദം എന്നിവ ഉൾപ്പെടുത്തിയിട്ടുണ്ട്.
20-ഓളം അന്താരാഷ്ട്ര, പ്രാദേശിക സംഗീതജ്ഞർ പരിപാടിയിൽ പങ്കെടുക്കും. ഈ പരിപാടിയിലൂടെ സമുദ്ര സംരക്ഷണത്തിനും പ്ലാസ്റ്റിക് മലിനീകരണത്തിനുമെതിരായ സന്ദേശം പൊതുജനങ്ങൾക്ക് നൽകുന്നതായിരിക്കും. സംഗീത പരിപാടിയുടെ വേദി, ഇൻസ്റ്റലേഷനുകൾ തുടങ്ങിയ എല്ലാ സജ്ജീകരണങ്ങളും പരിസ്ഥിതി സൗഹൃദമായാണ് തയാറാക്കിയിരിക്കുന്നത്.
സംഗീത പരിപാടികൾക്ക് പുറമേ വർക്ക്ഷോപ്പുകൾ, പാനൽ ചർച്ചകൾ എന്നിവയും നടക്കും. യൂണിവേഴ്സിറ്റി ആർട്ട് കോൺടെസ്റ്റാണ് മറ്റൊരു പ്രധാന ആകർഷണം. ദുബായിലെ സർവകലാശാലകളും ഡിസൻ സ്കൂളുകളും ഓഷ്യൻസ് ഓഫ് ചേഞ്ച് എന്ന വിഷയത്തിൽ കലാസൃഷ്ടികൾ അവതരിപ്പിക്കും. ഫെസ്റ്റിവലിന്റെ ഭാഗമായി ഫെസ്റ്റിവൽ മാർക്കറ്റ് ഫുഡ് ട്രക്കുകളും സജ്ജീകരിച്ചിട്ടുണ്ട്.
ഇംഗ്ലീഷ് പോപ് താരം ആൻ മരി, മൊറോക്കൻ ഗായകൻ റെഡ് വൺ, തുർക്കി താരം മുസ്തഫ സെസെലി, എമിറാത്തി ആർട്ടിസ്റ്റ് അർഖാം, ഫിലിപ്പിനോ ആൾട്ടർനേറ്റീവ് താരങ്ങൾ, ഇന്ത്യൻ ഹാർഡ് റോക്ക് സൂപ്പർഗ്രൂപ്പ് ഗിരിഷ് ആൻഡ് ദി ക്രോണിക്കിൾസ്, ബെന്നി ദയാൽ, ഫങ്ക്നേഷൻ, നൗമാൻ ബെലേച്ചി, പഞ്ചാബി ആർട്ടിസ്റ്റ് റിയാർ സാബ്, കോക് സ്റ്റുഡിയോ ആർട്ടിസ്റ്റുകളായ ഷെയ് ഗിൽ, യംഗ് സ്റ്റണ്ണേഴ്സ് എന്നിവർ സംഗീത പരിപാടിയിൽ പങ്കെടുക്കും. കൂടുതൽ വിവരങ്ങൾക്ക് വെബ്സൈറ്റ് സന്ദർശിക്കാം www.earthsoulfestival.com