സൂപ്പർ ഹിറ്റായ ജാനേമൻ, ജയ ജയ ജയ ജയ ഹേ എന്നീ ചിത്രങ്ങൾക്ക് ശേഷം ബേസിൽ ജോസഫും ചിയേഴ്സ് എന്റർടൈൻമെന്റും ഒന്നിക്കുന്ന പുതിയ സിനിമയാണ് ഫാലിമി. നവാഗതനായ നിർമ്മൽ സഹദേവ് സംവിധാനം ചെയ്യുന്ന ചിത്രത്തിന്റെ ടീസർ പുറത്തുവിട്ടു. ഒരു മുഴുനീള കുടുംബ ചിത്രമായിരിക്കും ഫാലിമി എന്ന് ചിരിയുണർത്തുന്ന ടീസർ ഉറപ്പ് നൽകുന്നു. നവംബർ 10 ചിത്രം പ്രദർശനത്തിന് എത്തും.
സിനിമയിൽ മഞ്ജു പിള്ളയും ജഗദീഷും പ്രധാന വേഷത്തിൽ എത്തുന്നുണ്ട്. കൂടാതെ സന്ദീപ് പ്രദീപ്, മീനാരാജ്, ജോമോൻ ജ്യോതിർ, അഭിറാം രാധാകൃഷ്ണൻ തുടങ്ങിയവരും ചിത്രത്തിൽ പ്രധാനവേഷത്തിൽ എത്തുന്നു. നേരത്തെ പുറത്തുവിട്ട സിനിമയുടെ ടൈറ്റിൽ വീഡിയോയും ശ്രദ്ധേയമായിരുന്നു.
ബേസിൽ ജോസഫും ജഗദീഷും ഇതാദ്യമായാണ് ഒന്നിക്കുന്നത്. ഏറെ കാലത്തിന് ശേഷം ജഗദീഷ് ഒരു മുഴുനീള കോമഡി വേഷമാണ് ചിത്രത്തിൽ കൈകാര്യം ചെയ്യുന്നത്. സംവിധായകൻ നിതീഷ് സഹദേവും സാഞ്ചോ ജോസഫും ചേർന്നാണ് തിരക്കഥ രചിച്ചിരിക്കുന്നത്. ചിയേഴ്സ് എന്റർടൈൻമെന്റ്‌സിന്റെ ബാനറിൽ ലക്ഷ്മി വാര്യർ, ഗണേഷ് മേനോൻ എന്നിവരും സൂപ്പർ ഡ്യൂപ്പർ ഫിലിംസിന്റെ ബാനറിൽ അമൽ പോൾസനും ചേർന്നാണ് ചിത്രം നിർമ്മിക്കുന്നത്.
