ഇന്ത്യൻ ചലചിത്രത്തെ ലോകത്തിന്റെ നെറുകയിലേക്ക് എത്തിച്ച സിനിമയാണ് ആർആർആർ. ഇതിലെ അഭിനയ മികവിന് ചലചിത്ര പ്രേമികളുടെ ശ്രദ്ധ പിടിച്ചു പറ്റിയ താരമാണ് ജൂനിയർ എൻടിആർ. ചലചിത്ര മേഖലയിലെ സംഭാവനകളെ മാനിച്ച് ഓസ്കാർ ആക്കാദമി ആക്ടർസ് ബ്രാഞ്ചിൽ ഇടം പിടിച്ചിരിക്കുകയാണ് ജൂനിയർ എൻടിആർ. എൻടിആറിന് പുറമേ കെ ഹുയ് ക്വാൻ, മാർഷ സ്റ്റെഫാനി ബ്ലേയ്ക്ക്, കെറി കോണ്ടൻ, റോസ സലാസർ എന്നിവരെയും ആക്ടർസ് ബ്രാഞ്ചിലേക്ക് തിരഞ്ഞെടുത്തിട്ടുണ്ട്. പുതിയ അംഗങ്ങളുടെ പട്ടിക അക്കാദമി ഓഫ് മോഷൻ പിക്ചർ ആർട്സ് ആൻഡ് സയൻസസിന്റെ ആക്ടർസ് ബ്രാഞ്ച് തന്നെയാണ് പുറത്തുവിട്ടത്.
അർപ്പണബോധവും പ്രതിഭാധനരുമായ ഇവരുടെ ആവിഷ്കാരങ്ങളിലൂടെയും മികച്ച അഭിനയത്തിലൂടെയും അവർ മിഥ്യയ്ക്കും യാഥാർത്ഥ്യത്തിനുമിടയിലുള്ള വിടവ് നികത്തുന്നു. അവർ അവതരിപ്പിക്കുന്ന കഥാപാത്രങ്ങളിലൂടെ നമുക്ക് നമ്മളെ തന്നെ കാണാൻ സാധിക്കുന്നു. അതുകൊണ്ടു തന്നെ പുതിയ താരങ്ങളെ സ്വഗതം ചെയ്യുന്ന കാര്യത്തിൽ അക്കാദമി വളരെ ആവേശത്തിലാണ് – അക്കാദമി കുറിച്ചു.
ജൂനിയർ എൻടിആർ ബോളിവുഡിലേയ്ക്ക് ചുവടുവെക്കുകയാണ്. ജാൻവി കപൂറിനും സെയ്ഫ് അലി ഖാനുമൊപ്പമായിരിക്കും അദ്ദേഹത്തിന്റെ അടുത്ത ചിത്രമെന്നും റിപ്പോർട്ടുകളുണ്ട്. ഹൃത്വിക് റോഷനൊപ്പം വാർ 2വിലേയ്ക്കും എൻടിആറിന് ക്ഷണം ലഭിച്ചിരുന്നു. എന്നാൽ, വാർ 2വിന്റെ മറ്റ് വിവരങ്ങൾ പുറത്ത് വന്നിട്ടില്ല.
