ഛിന്നഗ്രഹം 2023 ടികെ 15 ഇന്ന് ഭൂമിക്ക് സമീപത്ത് കൂടെ കടന്ന് പോകുമെന്ന് യുഎസ് ബഹിരാകാശ ഏജൻസി നാസ അറിയിച്ചു. ഭൂമിക്ക് സമീപമുള്ള ഛിന്നഗ്രഹങ്ങളുടെ കൂട്ടത്തെ അപ്പോളോ ഗ്രൂപ്പ് എന്നാണ് പറയുന്നത്. ഇതിൽ ഉൾപ്പെടുന്ന ഛിന്നഗ്രഹമാണ് 2023 ടികെ 15.
2023 ഒക്ടോബർ 20 ന് ഈ ഛിന്നഗ്രഹം ഭൂമിക്ക് തൊട്ടടുത്ത് കൂടി കടന്ന് പോകുമെന്നും, ഭൂമിയിൽ നിന്നും ഇതിന്റെ ദൂരം ചന്ദ്രനിലേക്കുള്ള ദൂരത്തേക്കാൾ കുറവാണെന്നും നാസ വ്യക്തമാക്കി. 3,84,400 കിലോമീറ്ററാണ് ഭൂമിയിൽ നിന്നും ചന്ദ്രനിലേക്കുള്ള ദൂരം. എന്നാൽ ഛിന്ന ഗ്രഹം 2023 ടികെ 15 3,79,994 കിലോമീറ്റർ വരെ എത്തിയതായും അവർ അറിയിച്ചു.
ആദ്യമായല്ല ഈ ഛിന്നഗ്രഹം ഭൂമിക്ക് സമീപത്ത് കൂടെ കടന്ന് പോകുന്നത്. മണിക്കൂറിൽ 79,085 കിലോമീറ്റർ വേഗതയിൽ സഞ്ചരിക്കുന്ന ഈ ഛിന്നഗ്രഹത്തിന് 150 അടി വലുപ്പം മാത്രമെ ഉള്ളൂ. വലുപ്പത്തിൽ ചെറുതായതിനാൽ തന്നെ ഭൂമിക്ക് ദോഷകരമായി ഇത് ബാധിക്കില്ലയെന്ന് നാസ വ്യക്തമാക്കിയിട്ടുണ്ട്.
1930 ൽ ജർമ്മൻ ശാസ്ത്രജ്ഞനായ കാൾ റെയിൻമുത്ത് കണ്ടെത്തിയ 1862 അപ്പോളോ ഛിന്നഗ്രഹത്തിന്റെ പേരിലാണ് ഈ ഛിന്നഗ്രഹം അറിയപ്പെടുന്നത്. പാറക്കൂട്ടങ്ങളിൽ നിന്നും അടർന്ന് വീഴുന്ന ഛിന്നഗ്രഹങ്ങൾ ഭൂമിയുടെ നേർക്ക് വരുന്നത് വഴി ഉണ്ടാകാൻ പോകുന്ന ആഘാതത്തിൽ നിന്നും ഭൂമിയെ രക്ഷിക്കുന്നതിന് വേണ്ടി നാസ ഛിന്നഗ്രഹങ്ങളെ നിരീക്ഷിച്ച് വരികയാണ്.