മൂന്ന് പതിറ്റാണ്ടിന് ശേഷം രജനികാന്തും അമിതാഭ് ബച്ചനും വീണ്ടും ഒന്നിക്കുന്നു. രജനികാന്ത് നായകനാവുന്ന തലൈവർ 170 എന്ന് താൽക്കാലികമായി പേരിട്ടിരിക്കുന്ന ചിത്രത്തിലാണ് അമിതാഭ് ബച്ചൻ എത്തുന്നത്. ഇപ്പോഴിതാ ബച്ചനൊപ്പമുള്ള ചിത്രം പങ്കുവച്ചുകൊണ്ട് രജനി തന്നെ ഈ പുനഃസമാഗമത്തിന്റെ സന്തോഷം എക്സിലൂടെ ( ട്വിറ്റർ) പങ്കുവച്ചിരിക്കുകയാണ്.
’33 വർഷത്തിന് ശേഷം ഞാൻ വീണ്ടും എന്റെ മാർഗദർശിക്കൊപ്പം, അമിതാഭ് ബച്ചൻ എന്ന പ്രതിഭാസത്തിനൊപ്പം അഭിനയിക്കുന്നു. ടി ജെ ജ്ഞാനവേൽ സംവിധാനം ചെയ്യുന്ന, ലൈക്ക പ്രൊഡക്ഷൻസിന്റെ തലൈവർ 170 എന്ന ചിത്രത്തിൽ. ആഹ്ലാദം കൊണ്ട് എന്റെ ഹൃദയം പ്രകമ്പനം കൊള്ളുന്നു’- ബച്ചനൊപ്പമുള്ള ചിത്രം പങ്കുവച്ചുകൊണ്ട് രജനികാന്ത് എക്സിൽ കുറിച്ചു.
https://x.com/rajinikanth/status/1717064523356766250?s=20
അതേസമയം അന്ധ കാനൂൺ, ഗെരഫ്താർ, ഹം തുടങ്ങി വിവിധ ചിത്രങ്ങളിൽ രജനിയും അമിതാഭ് ബച്ചനും മുൻപ് ഒരുമിച്ച് അഭിനയിച്ചിട്ടുണ്ട്. ഏറ്റവുമൊടുവിൽ പ്രദർശനത്തിനെത്തിയ ഹം എന്ന ചിത്രം വമ്പൻ ഹിറ്റായിരുന്നു. 1991-ൽ പുറത്തിറങ്ങിയ ഈ ചിത്രം മുകുൾ എസ് ആനന്ദാണ് സംവിധാനം ചെയ്തത്. ആക്ഷൻ ക്രൈം വിഭാഗത്തിൽ പെടുന്ന ഈ ചിത്രത്തിൽ നടൻ ഗോവിന്ദയും മറ്റൊരു പ്രധാന കഥാപാത്രത്തെ അവതരിപ്പിച്ചിരുന്നു.
