അന്നും ഇന്നും എന്നും ആരാധകർക്ക് ഏറെ പ്രിയപ്പെട്ട നടിയാണ് വാണി വിശ്വനാഥ്. മലയാള സിനിമയ്‌ക്കൊരു ആക്ഷൻ ക്വീൻ ഉണ്ടെങ്കിൽ അത് വാണി വിശ്വനാഥാണ്. ഇപ്പോഴിതാ ഒരുകാലത്ത് മുൻനിര നായികയായിരുന്ന വാണി വിശ്വനാഥ് നീണ്ട ഒൻപത് വർഷങ്ങൾക്ക് ശേഷം ചലച്ചിത്ര ലോകത്തേക്ക് തിരികെയെത്തുന്നു എന്ന വാർത്തകളാണ് പുറത്തുവരുന്നത്.
ശ്രീനാഥ് ഭാസി കേന്ദ്ര കഥാപാത്രത്തെ അവതരിപ്പിക്കുന്ന ‘ആസാദി’ എന്ന ചിത്രത്തിലാണ് വാണി വിശ്വനാഥ് തിരിച്ചുവരുന്നത്. സുപ്രധാനമായ ഒരു പോലീസ് കഥാപാത്രത്തെയാണ് വാണി വിശ്വനാഥ് ഈ ചിത്രത്തിൽ അവതരിപ്പിക്കുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്റർ അണിയറപ്രവർത്തകർ പുറത്തുവിട്ടിരുന്നു.
നടനും വാണി വിശ്വനാഥിന്റെ ഭർത്താവുമായ ബാബുരാജും പ്രിയനായികയുടെ തിരിച്ചുവരവിന്റെ സന്തോഷം സമൂഹമാദ്ധ്യമങ്ങളിൽ പങ്കുവച്ചിട്ടുണ്ട്. പോലീസ് വേഷത്തിലുള്ള വാണിയുടെ പോസ്റ്ററാണ് ബാബുരാജ് പങ്കുവച്ചിരിക്കുന്നത്. അതേസമയം നിരവധി പേരാണ് നടിയുടെ തിരിച്ചുവരവ് ആഘോഷമാക്കുന്നത്. ആക്ഷൻ രംഗങ്ങൾക്കായി ആകാംക്ഷയോടെ കാത്തിരിക്കുകയാണെന്നും ആരാധകർ പറയുന്നു.
നവാഗതനായ ജോ ജോർജ് ആണ് ചിത്രം സംവിധാനം ചെയ്യുന്നത്. ലിറ്റിൽ ക്രൂ പ്രൊഡക്ഷൻസിന്റെ ബാനറിൽ ഫൈസൽ രാജയാണ് ചിത്രം നിർമ്മിക്കുന്നത്. കുമ്പാരീസ്, വികാ, സത്യം മാത്രമേ ബോധിപ്പിക്കൂ, കനകരാജ്യം എന്നീ ചിത്രങ്ങളുടെ സംവിധായകൻ സാഗറാണ് ത്രില്ലർ വിഭാഗത്തിൽ പെടുന്ന ഈ ചിത്രത്തിന്റെ തിരക്കഥ ഒരുക്കിയിരിക്കുന്നത്. നടിയും ഡബ്ബിങ് കലാകാരിയും പ്രമുഖ ഡബ്ബിങ് താരം ശ്രീജ രവിയുടെ മകളുമായ രവീണാ രവിയാണ് ഈ ചിത്രത്തിലെ നായിക. ലാൽ, സൈജു കുറുപ്പ്, ടി.ജി. രവി, രാജേഷ് ശർമ്മ, ബോബൻ സാമുവൽ, സാബു ആമി, ജിലു ജോസഫ്, അഭിരാം, ആന്റണി ഏലൂർ, അബിൻ ബിനോ എന്നിവരും ചിത്രത്തിൽ അണിനിരക്കുന്നുണ്ട്.
