സാധാരണ സ്മാർട്ട്ഫോണുകളിൽ നിന്നും വ്യത്യസ്തമായവ വേണമെന്ന് ചിലരെങ്കിലും ആഗ്രഹിക്കാറുണ്ട്. ഇത്തരം ആളുകൾക്ക് കിടിലൻ സ്മാർട്ട് ഫോൺ അവതരിപ്പിച്ചിരിക്കുകയാണ് മോട്ടറോള. കൈത്തണ്ടയിൽ വാച്ച് കെട്ടുന്നത് പോലെ ചുറ്റാം എന്നതാണ് ഫോണിന്റെ സവിശേഷത.
ഫോൾഡിബിൾ ഫോണുകൾ ശക്തിപ്രാപിക്കുന്നതിനൊപ്പം മോട്ടറോള അവതരിപ്പിച്ച ബെൻഡബിൾ സ്മാർട്ട്ഫോൺ ഇതിനോടകം തന്നെ ചർച്ചയായി കഴിഞ്ഞു. കഴിഞ്ഞ ദിവസം നടന്ന ലെനോവോ ടെക് വേൾഡ് 2023 വാർഷിക ഇവന്റിലാണ് മോട്ടറോള പുതിയ ബെൻഡബിൾ കൺസെപ്റ്റ് ഫോൺ അവതരിപ്പിക്കുന്നത്.
പോൾഇഡ് ഡിസ്പ്ലേയുള്ള ഫോൺ ഇതിനോടകം തന്നെ ചർച്ചയായി കഴിഞ്ഞു. ഫോൾഡബിൾ ഫോൺ യാഥാർത്ഥ്യമായതിനൊപ്പം തന്നെ ബെൻഡബിൾ ഫോണുകളും വിപണിയിൽ എത്തുമെന്ന് മോട്ടറോള പറയുന്നു. 2016-ൽ സാൻ ഫ്രാൻസിസ്കോയിലെ ടെക് വേൾഡ് ഷോയിൽ വളയ്ക്കാനും കയ്യിൽ ധരിക്കാനും കഴിയുന്ന ഒരു സ്മാർട്ട്ഫോൺ ലെനോവോ അവതരിപ്പിച്ചിരുന്നു. സി പ്ലസ് എന്നായിരുന്നു ഫോണിന്റെ പേര്.
ഫുൾ-എച്ച്ഡിപ്ലസ് പോൾഇഡ് ഡിസ്പ്ലേയുള്ള സ്മാർട്ട്ഫോണിലേക്കുള്ള വളർച്ച മോട്ടറോള അവതരിപ്പിച്ച ബെൻഡബിൾ ഫോൺ അടയാളപ്പെടുത്തുന്നു. മോട്ടറോള അവതരിപ്പിച്ച ഫോണിലുള്ള അഡാപ്റ്റീവ് ഡിസ്പ്ലേ കൺസെപ്റ്റ് ഒരു സാധാരണ ആൻഡ്രോയിഡ് ഫോണിൽ നിന്നും വ്യത്യസ്തമാണ്. കയ്യിൽ ചുറ്റിയാൽ വലിയ ഡിസ്പ്ലേയുള്ള ഒരു വാച്ചിന് സമാനമാണ് ഫോൺ. പലവിധത്തിൽ വളച്ച് നിർത്താൻ സാധിക്കും എന്നതാണ് മറ്റൊരു പ്രത്യേകത. അഡാപ്റ്റീവ് ഡിസ്പ്ലേ കൺസെപ്റ്റ് എന്നാണ് ഈ പരീക്ഷണത്തിന് പേര് നൽകിയിരിക്കുന്നത്.