തിയറ്ററുകളിലെ വിജയക്കുതിപ്പിനിടെ മമ്മൂട്ടി ചിത്രം കണ്ണൂർ സ്ക്വാഡ് ഒടിടിയിലേയ്ക്ക്. ഡിസ്നിപ്ലസ് ഹോട്ട്സ്റ്റാറിലൂടെയായിരിക്കും ചിത്രം പ്രദർശനത്തിനെത്തുക. നവംബർ പകുതിയോടെ സിനിമ ഒടിടിയിലെത്തുമെന്ന് അണിയറപ്രവർത്തകർ അറിയിച്ചു. വളരെ ചെറിയ ബജറ്റിൽ ഒരുങ്ങിയ ചിത്രം തിയറ്ററിൽ വൻ കളക്ഷൻ നേടി മുന്നേറുകയാണ്. നടൻ റോണി വർഗ്ഗീസിന്റെ സഹോദരൻ റോബി വർഗ്ഗീസാണ് കണ്ണൂർ സ്ക്വാഡ് സംവിധാനം ചെയ്തിരിക്കുന്നത്.
യുവ താരനിരയ്ക്കൊപ്പം മമ്മൂട്ടി കേന്ദ്ര കഥാപാത്രമാകുന്ന കണ്ണൂർ സ്ക്വാഡ് ഒരു ഇൻവസ്റ്റിഗേഷൻ ത്രില്ലർ ചിത്രമാണ്. കിഷോർ കുമാർ, വിജയരാഘവൻ, അസീസ് നെടുമങ്ങാട്, ശബരീഷ്, റോണി ഡേവിഡ്, മനോജ് കെ യു, അർജുൻ രാധാകൃഷ്ണൻ, ദീപക് പറമ്പോൽ, ധ്രുവൻ, ഷെബിൻ ബെൻസൺ എന്നിവരാണ് ചിത്രത്തിലെ പ്രധാന കഥാപാത്രങ്ങൾ. മമ്മൂട്ടി കമ്പനി നിർമ്മിച്ച സിനിമ ദുൽഖറിന്റെ വേഫെറർ ഫിലിംസാണ് പ്രദർശനത്തിനെത്തിച്ചത്.
സെപ്തംബർ 28 നായിരുന്നു കണ്ണൂർ സ്ക്വാഡ് പ്രദർശനത്തിനെത്തിയത്. ആദ്യ ദിനം മുതൽ സിനിമ മികച്ച അഭിപ്രായം നേടി മുന്നേറുകയാണ്. മുഹമ്മദ് ഷാഫിയും നടൻ റോണി ഡേവിഡും ചേർന്നാണ് ചിത്രത്തിന്റെ തിരക്കഥ രചന നടത്തിയിരുക്കുന്നത്. ഇതിനോടകം വമ്പൻ റിലീസുകൾ എത്തിയിട്ടും കണ്ണൂർ സ്ക്വാഡ് മികച്ച കളക്ഷൻ നേടി മുന്നേറുകയാണ്.
