കൊച്ചി : സ്ത്രീകൾക്ക് പ്രാധാന്യം ലഭിക്കാൻ നിയമം കൊണ്ടു വരേണ്ട സമൂഹത്തിലാണ് നമ്മൾ ജീവിക്കുന്നതെന്ന് തിരക്കഥാകൃത്തും നടനുമായ രൺജി പണിക്കർ. പൊളിറ്റിക്കൽ കറക്ട്നെസ് എന്ന വിഷയവുമായി ബന്ധപ്പെട്ട് സ്വകാര്യ മാദ്ധ്യമത്തോട് സംസാരിക്കുകയായിരുന്നു അദ്ദേഹം .
നമ്മുടെ സമൂഹത്തിൽ സ്ത്രീവിരുദ്ധമായതൊന്നും സംഭവിക്കുന്നില്ലേ..? മനുഷ്യരാശിക്ക് തന്നെ വിരുദ്ധമായിട്ടുള്ള നിരവധി കാര്യങ്ങൾ നമ്മുടെ സമൂഹത്തിൽ സംഭവിക്കുന്നില്ലേ… സ്ത്രീ വിരുദ്ധമല്ലേ സൊസൈറ്റി?. ഒരുപാട് വ്യവസ്ഥകൾ ഉള്ള സമൂഹത്തിൽ ഏതാണ് പൊളിറ്റിക്കലി കറക്ട്?.അത് സിനിമയിൽ പറയുന്നതാണോ കുഴപ്പം. മനുഷ്യർ തമ്മിൽ സംസാരിക്കുന്ന ഭാഷ സിനിമയിൽ സംസാരിച്ചാൽ അത് സ്ത്രീവിരുദ്ധമാണോ?
മനുഷ്യവിരുദ്ധമായിട്ടുള്ള കാര്യങ്ങൾ എല്ലാ കാലവും സിനിമയ്ക്ക് വിഷയമായിട്ടുണ്ട്. സ്ത്രീയെ ആക്രമിക്കുന്ന രംഗം സിനിമയിൽ കാണിക്കരുതെന്ന് പറയുമ്പോൾ സജസ്റ്റീവായിട്ട് കാണിക്കാനാണ് എല്ലാവരും ശ്രമിക്കുന്നത്.ഏറ്റവും പുരോഗമന പാർട്ടി എന്ന് അവകാശപ്പെടുന്നവരുടെ പോളിറ്റ് ബ്യൂറോയിൽ എത്ര സ്ത്രീകളുണ്ട് .
ഇവിടെ എത്ര സ്ത്രീ മുഖ്യമന്ത്രിമാർ ഉണ്ടായി? ഗുജറാത്തിലും ഗോവയിലും യുപിയിലും തമിഴ്നാട്ടിലും വനിതാ മുഖ്യമന്ത്രിമാർ ഉണ്ടായിട്ടുണ്ട്. ഏറ്റവും പുരോഗമിച്ച സമൂഹം എന്നാണല്ലോ നമ്മൾ പറയുന്നത് . സ്ത്രീ ലിബറേറ്റഡ് അല്ല നമ്മുടെ സൊസൈറ്റി. ഓരോ വീടും സ്ത്രീവിരുദ്ധമല്ലേ. കേരളത്തിലെ ചില തൊഴിലിടങ്ങളിൽ സ്ത്രീക്കും പുരുഷനും തുല്യ വേതനമില്ല അതാണ് സ്ത്രീ വിരുദ്ധത. സിനിമ ചന്ദ്രനിൽ നിന്നും ഇറക്കുമതി ചെയ്തതല്ലേല്ലോ.’- അദ്ദേഹം പറഞ്ഞു.