ലോകത്തിലെ ഏറ്റവും ജനപ്രിയ സെർച്ച് എഞ്ചിനാണ് ഗൂഗിൾ. വിവരശേഖരണത്തിനായി ആളുകൾ ആദ്യം ആശ്രയിക്കുന്നത് ഗൂഗിളിനെയാണ്. എന്നാൽ പലപ്പോഴും വ്യക്തിഗത വിവരങ്ങളും ഗൂഗിളിൽ നിന്നും ലഭിക്കാറുണ്ട്. മിക്കപ്പോഴും ഇത് സ്വകാര്യതയിലേക്കുള്ള കടന്നു കയറ്റമാണ്. ഇന്റർനെറ്റിൽ പ്രത്യക്ഷപ്പെടാൻ താത്പര്യമില്ലാത്തവർക്ക് ഇതൊരുപക്ഷെ ബുദ്ധിമുട്ടായേക്കാം. ഇതിനാൽ തന്നെ അപരിചിതർ ഗൂഗിളിൽ നിങ്ങളുടെ പേര് തിരയുകയാണെങ്കിൽ ഫോൺനമ്പർ, ഇമെയിൽ, വീട്ടുവിലാസം എന്നിവ കണ്ടെത്താൻ സാധിക്കും.
ഇപ്പോഴിതാ ഇത്തരം കാര്യങ്ങൾ പരസ്യമാക്കാൻ ആഗ്രഹക്കുന്നില്ലെങ്കിൽ ഗൂഗിൾ ഇതിന് പുതിയ ഒരു ഫീച്ചർ അവതരിപ്പിച്ചിരിക്കുകയാണ്. ഈ ഫീച്ചർ നിലവിൽ തിരഞ്ഞെടുത്ത രാജ്യങ്ങളിൽ മാത്രമാണ് പ്രാബല്യത്തിൽ വന്നിരിക്കുന്നത്. എന്നാൽ അധികം വൈകാതെ തന്നെ കൂടുതൽ പ്രദേശങ്ങളിലേക്ക് വ്യാപിപ്പിക്കാൻ ഗൂഗിൾ പദ്ധതിയിടുകയാണ്.
സ്വകാര്യ വിവരങ്ങൾ എങ്ങനെ നീക്കം ചെയ്യാം?
റിമൂവ് ദിസ് റിസൾട്ട് എന്ന് വിളിക്കപ്പെടുന്ന ഫീച്ചർ നിലവിൽ പരിശോധനയിലാണ്. എന്നാൽ സെർച്ച് വെബ്സൈറ്റിൽ വ്യക്തിഗത വിവരങ്ങൾ അടങ്ങുന്ന പേജുകൾ നീക്കം ചെയ്യണമെന്ന് ഗൂഗിളിനോട് ആവശ്യം ഉന്നയിക്കാൻ വ്യക്തികൾക്ക് സാധിക്കും. എന്നാൽ ഇന്റർനെറ്റിൽ നിന്നോ യഥാർത്ഥ വെബ്സൈറ്റിൽ നിന്നോ ഈ വിവരങ്ങൾ നീക്കം ചെയ്യില്ല. ഗൂഗിളിൽ നിന്നും ആളുകൾക്ക് ആക്സസ് ചെയ്യാനാകില്ല എന്നത് മാത്രമാണ് സാധ്യമാകുക.
മിക്കപ്പോഴും ഒരു സെർച്ച് റിസൾട്ട് നീക്കം ചെയ്യുന്നതിനായി ഗൂഗിളിന് മൂന്ന് മുതൽ നാല് വരെ ആഴ്ച സമയമെടുക്കും. കൂടാതെ ഗൂഗിളിന്റെ ആക്ടിവിറ്റി പേജിൽ നീക്കം ചെയ്യുന്നത് ഏത് ഘട്ടത്തിലാണെന്നും പരിശോധിക്കാനാകും. വ്യക്തിഗത വിവരങ്ങൾ, ബാങ്ക് അക്കൗണ്ട് നമ്പറുകൾ തുടങ്ങിയ വിവരങ്ങൾ നീക്കം ചെയ്യുന്നതിനും ഈ രീതി ഉപയോഗിക്കാനാകും. പുതിയ ഫീച്ചർ നിലവിൽ വരുന്നതോടെ സ്വകാര്യത ഉറപ്പു വരുത്തുന്നു. ഇതിലൂടെ ഐഡന്റിറ്റി മോഷണം ഉൾപ്പെടെ തടയാൻ സാധിക്കുന്നു.
ഈ ഫീച്ചർ എങ്ങനെ ഉപയോഗിക്കാം…
- ഗൂഗിളിൽ നിങ്ങളുടെ പേര് സെർച്ച് ചെയ്യുക
- നീക്കം ചെയ്യാൻ ആഗ്രഹിക്കുന്ന വിവരങ്ങൾ അടങ്ങിയ വെബ് പേജ് കണ്ടെത്തി ഇതിന് അടുത്തുള്ള മൂന്ന് ഡോട്ടുകളിൽ ക്ലിക്ക് ചെയ്യുക.
- മുകളിൽ വലത് ഭാഗത്തായി കാണപ്പെടുന്ന റിമൂവ് റിസൾട്ട് ക്ലിക്ക് ചെയ്യുക
- വരുന്ന അഞ്ച് ഓപ്ഷനുകളിൽ ഫോൺ നമ്പർ, ഇമെയിൽ, വീട്ടുവിലാസം എന്നിവയ്ക്കായി ഇറ്റ് ഷോസ് മൈ പേഴ്സണൽ ഇൻഫോ എന്ന ഓപ്ഷൻ തിരഞ്ഞെടുക്കുക.
- നീക്കം ചെയ്യാൻ ആഗ്രഹിക്കുന്ന പേരും, കോൺടാക്ട് വിവരങ്ങളും നൽകുക. കണ്ടിന്യൂ നൽകി സെൻഡ് എന്ന ഓപ്ഷൻ തിരഞ്ഞെടുക്കുക.
- റിക്വസ്റ്റ് റിവ്യൂ ചെയ്യുന്നതിനായി ഗോ ടു റിമൂവൽ റിക്വസ്റ്റ് ക്ലിക്ക് ചെയ്യുക.
