മുംബൈ: മുംബൈ മറൈൻ ഡ്രൈവ് ബീച്ചിൽ ആരാധകരെ കണ്ട് ഇന്ത്യൻ താരം സൂര്യ കുമാർ യാദവ്. മാസ്കും കൂളിങ് ഗ്ലാസും ഫുൾ സ്ലീവ് ഷർട്ടും അണിഞ്ഞിരുന്ന ക്യാമറാമാൻ ആരെന്ന് തിരിച്ചറിയാൻ ബീച്ചിലുളളവർക്ക് കഴിഞ്ഞില്ല. ലോകകപ്പിലെ ഇന്ത്യൻ ടീമിന്റെ പ്രകടനത്തെ കുറിച്ചുളള അഭിപ്രായങ്ങൾ ചോദിച്ചാണ് ആരാധകർക്കിടയിൽ ഫോട്ടോഗ്രാഫറെ പോലെ സൂര്യ നടന്നത്. എന്നാൽ പിന്നീട് അദ്ദേഹം മാസ്ക് മാറ്റിയതും ആരാധകർ ഞെട്ടി. തങ്ങളെ തേടിയെത്തിയത് ഇന്ത്യൻ ക്രിക്കറ്റ് താരം സൂര്യകുമാർ യാദവാണെന്ന് ആരാധകർ അറിയുന്നത് അപ്പോഴാണ്. പിന്നെ താരത്തിനൊപ്പം ഫോട്ടോയെടുക്കാനുളള ആരാധകരുടെ തിരക്കും സൂര്യയ്ക്ക് ഉപദേശം നൽകുന്ന ആരാധകനെയും വിഡീയോയിൽ കാണാം.
View this post on Instagram
“>
ക്രിക്കറ്റ് കളിക്കുന്നതിനൊപ്പം തനിക്ക് അഭിനയം കൂടി വശമുണ്ടെന്നാണ് സൂര്യ ഇതിലൂടെ തെളിയിച്ചത്. ശരീരത്തിലെ ടാറ്റു മുഴുവൻ മറക്കാൻ ഫുൾ സ്ലീവ് ഷർട്ട് അണിഞ്ഞു. ഒപ്പം ഒരു മാസ്കും തൊപ്പിയും. താരത്തെ ആദ്യം കണ്ടപ്പോൾ സഹതാരം ജഡേജക്ക് പോലും തിരിച്ചറിയാനായില്ല. ഇക്കാര്യം ജഡേജ സൂര്യയോട് പറയുന്നതും വീഡിയോയിൽ കാണാം. ഇന്ത്യൻ ടീമിന്റെ പ്രകടനത്തിന് പുറമെ ആരാധകരോട് തന്റെ വ്യക്തിഗത പ്രകടനത്തെ പറ്റിയും സൂര്യ ചോദിക്കുന്നുണ്ട്. സൂര്യക്ക് അവസരം ലഭിക്കുന്നില്ലെന്നും അതിന് മുമ്പ് ഇന്ത്യൻ ടീം ജയിക്കുന്നുവെന്നും ഒരു ആരാധകൻ പറഞ്ഞു. സൂര്യ തന്റെ പ്രകടനം മെച്ചപ്പെടുത്തണമെന്നും ചില ആരാധകർ പറയുന്നുണ്ട്.
സമൂഹമാദ്ധ്യമത്തിൽ വൈറലായ ഈ വീഡിയോയുടെ അവസാനത്തിൽ താൻ മികച്ചൊരു നടൻ കൂടിയാണെന്ന് സൂര്യ പറയുന്നതും കേൾക്കാം. സൂര്യയുടെ മേക്ക് ഓവർ ലുക്കിലുളള വിഡീയോ ഇന്ത്യൻ ക്രിക്കറ്റ് ടീം തങ്ങളുടെ ഒഫീഷ്യൽ പേജിലും പങ്കുവച്ചിട്ടുണ്ട്. ‘മുമ്പൊന്നും നിങ്ങൾ കാണാത്ത രൂപത്തിൽ സൂര്യയെ അവതരിപ്പിക്കുന്നു’ എന്നാണ് വീഡിയോക്ക് നൽകിയിരിക്കുന്ന അടിക്കുറിപ്പ്.
