ന്യൂഡൽഹി: 2000 രൂപാ നോട്ടുകൾ മാറ്റിയെടുക്കാൻ സാധിക്കാത്തവർക്കായി വീണ്ടും അവസരമൊരുക്കി ആർബിഐ. ടിഎൽആർ (ട്രിപ്പിൾ ലോക്ക് റിസപ്റ്റാക്കിൾ), ഇൻഷ്വർ പോസ്റ്റ് എന്നിവയിലൂടെ പൊതുജനങ്ങൾക്ക് ഇനിയും നോട്ടുകൾ മാറ്റിയെടുക്കാൻ സാധിക്കും. റിസർവ്വ് ബാങ്കിന്റെ നിർദ്ദിഷ്ട ഓഫീസുകളിലേക്കാണ് ഇതുവഴി പണം അയക്കാൻ കഴിയുക. തപാൽ വകുപ്പിന്റെ ഇൻഷ്വർ ചെയ്ത പോസ്റ്റിലൂടെ റീജിയണൽ ഓഫീസുകളിലേക്ക് അയക്കുന്ന പണം ഉപഭോക്താവിന്റെ ബാങ്ക് അക്കൗണ്ടുകളിലേക്ക് നേരിട്ട് ലഭിക്കും.
നോട്ട് മാറ്റി വാങ്ങാനുളള സുരക്ഷിതമായ മറ്റൊരു മാർഗമാണ് ടിഎൽആർ ഫോം. ഇത് ആർബിഐയാണ് നൽകുക. റിസർവ്വ് ബാങ്കിന്റെ ഡൽഹി ഓഫീസിൽ ഇതുവരെ 700 ടിഎൽആർ ഫോമുകളാണ് ലഭിച്ചത്. രണ്ടായിരം രൂപാ നോട്ടുകൾ മാറ്റിയെടുക്കാൻ പ്രയാസപ്പെടുന്ന ജനങ്ങൾക്ക് ഈ രണ്ട് വഴികളും പ്രയോജനപ്രദമാകുമെന്ന് ആർബിഐ റീജിയണൽ ഡയറക്ടർ രോഹിത് പി ദാസ് പറഞ്ഞു.