രാത്രിയിലെ ഉറക്കക്കുറവ് പലരും നേരിടുന്ന വലിയ പ്രശ്നമാണ്. ഉറക്കം നഷ്ടപ്പെടുന്നതിന് പലവിധ കാരണങ്ങളുണ്ടെങ്കിലും ഉത്കണ്ഠയും ജീവിതശൈലിയും വളരെയധികം സ്വാധീനിക്കുന്നുണ്ട്. ഉറക്കമില്ലായ്മ കടുത്ത പ്രശ്നമായി മാറുന്ന സാഹചര്യത്തിൽ വൈദ്യ സഹായം തേടുന്നതാണ് ഉചിതം. എന്നാൽ നന്നായി ഉറക്കം ലഭിക്കുന്നതിന് ചില ഭക്ഷണങ്ങൾ കഴിക്കുന്നതും നല്ലതാണ്. ഇത്തരത്തിൽ ഉറക്കത്തിന് സഹായിക്കുന്ന ഭക്ഷണങ്ങൾ ഏതെല്ലാമെന്ന് നോക്കാം…
ഉറക്കക്കുറവ് നേരിടുന്നവർ കഴിച്ചിരിക്കേണ്ട ഫലമാണ് കിവി. വിറ്റാമിൻ സി, ഇ എന്നിവയും പൊട്ടാസ്യം, ഫോളേറ്റ് എന്നിവ ഇതിൽ ധാരാളമായി അടങ്ങിയിട്ടുണ്ട്. ഇവയിൽ അടങ്ങിയിരിക്കുന്ന ആന്റി ഓക്സിഡന്റ് ഉറക്കം നന്നാവാൻ സഹായിക്കുന്നു. രാത്രി കിടക്കുന്നതിന് ഒരു മണിക്കൂർ മുമ്പ് രണ്ട് കിവി പഴം കഴിച്ചിട്ട് കിടക്കുന്നത് നന്നായി ഉറങ്ങാൻ സഹായിക്കും. ഓട്സും ഉറക്കം നന്നായി ലഭിക്കാൻ സഹായിക്കും. ഓട്സിൽ ഫൈബർ, വിറ്റാമിൻ ബി, സിങ്ക് എന്നിവ ധാരാളം അടങ്ങിയിട്ടുണ്ട്. ഇതിനാൽ തന്നെ ഓട്സ് ഉറക്കം കിട്ടുന്നതിന് സഹായകമാകും.
ബദാം ഡയറ്റിൽ പതിവാക്കുന്നത് ഉറക്കം ലഭിക്കാൻ നല്ലതാണ്. മഗ്നീഷ്യം ധാരാളമായി ബദാമിൽ അടങ്ങിയിട്ടുണ്ട്. ഉറക്കത്തിന് സഹായിക്കുന്ന മെലാറ്റോണിന്റെ ഉത്പാദനം നിയന്ത്രിക്കുന്ന ഒന്നാണ് മഗ്നീഷ്യം. കൂടാതെ വലിയ തോതിൽ മഗ്നീഷ്യവും പൊട്ടാസ്യവും അടങ്ങിയിട്ടുള്ള ഒന്നാണ് നേന്ത്രപ്പഴം. ഇത് ഉറക്കത്തിലേക്ക് നയിക്കാൻ സഹായകമാണ്. രാത്രി ഉറങ്ങുന്നതിന് മുമ്പ് നേന്ത്രപ്പഴം കഴിക്കുന്നത് ഉറക്കം കിട്ടാൻ സഹായിക്കും.
