ജനപ്രിയനായകൻ ദിലീപ് വൻ മാസ്സ് ഗെറ്റപ്പിൽ എത്തുന്ന ബാന്ദ്രയ്ക്കായി ഏറെ ആവേശത്തോടെയാണ് ആരാധകർ കാത്തിരിക്കുന്നത്. തെന്നിന്ത്യൻ താരസുന്ദരി തമന്നയാണ് ചിത്രത്തിൽ ദിലീപിന്റെ നായിക. തമന്നയുടെ ആദ്യ മലയാള ചിത്രം കൂടിയാണിത്. തമിഴ്, തെലുങ്ക്, ഹിന്ദി സിനിമകളിൽ തിളങ്ങിയിട്ടുള്ള താരം ബാന്ദ്രയിലൂടെ മലയാളത്തിലേക്ക് ചുവടുവച്ചിരിക്കുകയാണ്.
ദിലീപിനെക്കുറിച്ചും ബാന്ദ്രയെക്കുറിച്ചും തമന്ന പറഞ്ഞ വാക്കുകളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. ബാന്ദ്ര തന്റെ പുതിയ തുടക്കമാണെന്നും ദിലീപിനൊപ്പം അഭിനയിക്കാൻ കഴിഞ്ഞതിൽ വളരെയധികം സന്തോഷമുണ്ടെന്നും തമന്ന പറയുന്നു.
‘ദിലീപ് എന്ന നടൻ നൽകിയ പിന്തുണ എനിക്ക് മറക്കാൻ കഴിയില്ല. ഇതുപോലെ ഒരു താരത്തെ ഇതുവരെ കണ്ടിട്ടില്ല. വളരെ സിംപിളാണ്. ദയാ ശീലമുള്ളയാൾ. കൂടെയുള്ളവർക്ക് വേണ്ട പരിഗണന എപ്പോഴും കൊടുക്കും. സെറ്റിൽ എല്ലാവരും ഒരു കുടുംബം പോലെയായിരുന്നു. വളരെ പോസിറ്റീവ് വൈബ്സ് ആയിരുന്നു.
അനുഭവ സമ്പത്ത് ഏറെയുള്ള നടനാണ് ദിലീപ്. ഒപ്പം ജോലി ചെയ്യുന്നവർക്ക് വേണ്ട സ്ഥാനം കൊടുക്കാൻ അദ്ദേഹം പ്രത്യേകം ശ്രദ്ധിക്കുന്നുണ്ട്. എല്ലാവർക്കും ഒരുപോലെ ശോഭിക്കാൻ അവസരം കൊടുക്കാറുണ്ട്. സെറ്റിൽ എല്ലാവരെയും കംഫർട്ടാക്കാൻ ശ്രദ്ധിക്കുന്നു. ആദ്യ മലയാള സിനിമ ആയതിനാൽ ഭാഷ എനിക്കൊരു പ്രശ്നമായിരുന്നു. അതൊരു വെല്ലുവിളിയായി തോന്നി. എന്നാൽ ദിലീപും സഹതാരങ്ങളും വളരെയധികം പിന്തുണ നൽകി. അതിന്റെ ഫലം തീർച്ചയായും ലഭിച്ചിട്ടുണ്ടെന്ന് ഞാൻ കരുതുന്നു.’- തമന്ന വ്യക്തമാക്കി.
ബാന്ദ്ര മലയാളത്തിലെ ആദ്യ ചിത്രമാണ്. അതിനാൽ വളരെ ആകാംക്ഷയും ഉത്കണ്ഠയുമുണ്ടെന്നും പുതിയ തുടക്കമാണിത്, ബാന്ദ്ര തിയേറ്ററിലെത്താൻ കാത്തിരിക്കുകയാണെന്നും നടി പറഞ്ഞു. മാത്രമല്ല മലയാളത്തിൽ ഇതുപോലെ ഒരവസരം ലഭിച്ചതിൽ വളരെ സന്തോഷമുണ്ട്. ഇങ്ങനെയൊരു വേഷം തന്നതിന് സംവിധായകൻ അരുൺ ഗോപിക്ക് നന്ദി. നല്ലൊരു ടീമായിരുന്നു. വലിയ പ്രതീക്ഷയുണ്ട്, എല്ലാവർക്കും ഏറെ ഇഷ്ടപ്പെടുന്ന സിനിമയായിരിക്കും ബാന്ദ്രയെന്നും തമന്ന കൂട്ടിച്ചേർത്തു.
ദിലീപ്-അരുൺ ഗോപി കൂട്ടുക്കെട്ടിൽ ഒരുങ്ങുന്ന ചിത്രം നവംബർ 10-നാണ് റിലീസ് ചെയ്യുന്നത്. രാമലീല എന്ന ഹിറ്റ് ചിത്രത്തിന് ശേഷം മാസ് കോംബോ വീണ്ടും ഒന്നിക്കുന്നു എന്നത് തന്നെയാണ് ഈ ചിത്രത്തിന്റെ പ്രതീക്ഷയും. ദിലീപിന്റെ കരിയറിലെ 147-ാം സിനിമയാണിത്. പാൻ ഇന്ത്യൻ താരനിരയാണ് ചിത്രത്തിനായി അണി നിരന്നിരിക്കുന്നത്. തമിഴ് നടൻ ശരത് കുമാർ, ബോളിവുഡ് നടൻ ദിനോ മോറിയ, സിദ്ദിഖ്, കലാഭവൻ ഷാജോൺ, ഗണേഷ് കുമാർ തുടങ്ങിയവരും ചിത്രത്തിലുണ്ട്.
ആക്ഷന് വലിയ പ്രാധാന്യം നൽകുന്ന ചിത്രത്തിൽ ഡോൺ കഥാപാത്രമായാണ് ദിലീപ് എത്തുക. സിനിമയുടെ മാസ് ആക്ഷൻ രംഗങ്ങൾ ഒരുക്കിയിരിക്കുന്നത് അൻപറിവ്, ഫിനിക്സ് പ്രഭു, മാഫിയ ശശി എന്നിവരാണ്. അജിത് വിനായക ഫിലിംസിന്റെ ബാനറിൽ വിനായക അജിത് നിർമിക്കുന്ന ചിത്രത്തിൽ ഉദയകൃഷ്ണയാണ് തിരക്കഥ ഒരുക്കുന്നത്.