കുറച്ച് മാസങ്ങൾകൊണ്ട് രാജ്യത്തെ ഒട്ടുമിക്ക പേരുടെയും ഹിറ്റ് ലിസ്റ്റിൽ ഇടം പിടിച്ച ഗാനമാണ് കോക് സ്റ്റുഡിയോ ഭാരത് പുറത്തിറക്കിയ ‘ഖലാസി’. ഗാനത്തിന്റെ അർത്ഥം അറിയാത്തവർ പോലും പാട്ടിനെ ഏറ്റെടുത്തു. ഗുജറാത്തി ഗായകൻ ആദിത്യ ഗാദ്വിയാണ് ഈ ഗാനം ആലപിച്ചത്. ഇപ്പോഴിതാ, ഈ പാട്ടിനെ പ്രശംസിച്ച് പ്രധാനമന്ത്രിയും രംഗത്ത് എത്തിയിരിക്കുകയാണ്. എക്സ് അക്കൗണ്ടിലൂടെയാണ് അഭിനന്ദനം അറിയിച്ചത്
മോദി സ്റ്റോറി എന്ന പേജിന് ആദിത്യ ഒരു അഭിമുഖം കൊടുത്തിരുന്നു. അഭിമുഖത്തിന്റെ ചില ഭാഗങ്ങൾ മോദി സ്റ്റോറി എന്ന പേജ് എക്സിൽ പങ്കുവെച്ചിരുന്നു. ഇത് റീപോസ്റ്റ് ചെയ്താണ് പ്രശംസിച്ചത്. ’ഖലാസി’ ഗാനം ഹിറ്റ് ചാര്‍ട്ടുകളില്‍ ഇടംപിടിച്ചു, ആദിത്യ ഗാദ്വിയുടെ സംഗീതം ഹൃദയങ്ങൾ കീഴടക്കുന്നു എന്നായിരുന്നു പ്രധാനമന്ത്രി എക്സിൽ കുറിച്ചത്.
Khalasi is topping the charts and Aditya Gadhvi is winning hearts for his music.
This video brings back memories from a special interaction…@AdityaGadhvi03 https://t.co/XmfgzXLmOW
— Narendra Modi (@narendramodi) November 3, 2023
അഭിമുഖത്തിൽ പ്രധാനമന്ത്രി നരേന്ദ്ര മോദിയുമായുള്ള കൂടിക്കാഴ്ചയെക്കുറിച്ചും പറയുന്നുണ്ട്. പ്രധാനമന്ത്രി മോദി ഗുജറാത്ത് മുഖ്യമന്ത്രിയായിരുന്ന സമയത്ത് തന്‍റെ സംഗീത പരിപാടിയില്‍ പങ്കെടുത്തെന്നും ആദിത്യ പറയുന്നുണ്ട്. 2023 ജൂലൈയിൽ കോക്ക് സ്റ്റുഡിയോ ഭാരതിൽ പുറത്തിറങ്ങിയ ഖലാസിയുടെ ട്രെൻഡ് മാസങ്ങൾ കഴിഞ്ഞിട്ടും അവസാനിച്ചില്ല. അഞ്ച് കോടിയിലധികം ആളുകളാണ് ഇതുവരെ കോക് സ്റ്റുഡിയോയുടെ വൈറൽ ഗാനം യൂട്യൂബിലൂടെ കണ്ടത്. പല സെലിബ്രിറ്റികളും ഈ പാട്ടിന് ചുവടുവെച്ചുള്ള റീലുകളും വൈറലാണ്.
