ശതകോടീശ്വരനായ ഇലോൺ മസ്‌കും മെറ്റയുടെ ഉടമസ്ഥനായ മാർക്ക് സക്കർബർഗും തമ്മിലുള്ള സൈബർ യുദ്ധം ഏറെ കാലമായി തുടരുകയാണ്. ട്വിറ്ററിന് ബദലായി സക്കർബർഗ് ത്രെഡ്‌സ് ആരംഭിച്ചതോടെ ഈ തർക്കം രൂക്ഷമായിരുന്നു. ഏറ്റവും ഒടുവിലായി ഇൻസ്റ്റഗ്രാമിനെതിരെ ആരോപണവുമായി എത്തിയിരിക്കുകയാണ് മസ്‌ക്.
പുതിയ സൈബർ യുദ്ധത്തിന് തുടക്കമിട്ടത് ഡോജ് ഡിസൈനർ എന്ന പേരിലുള്ള ട്വിറ്റർ ഹാൻഡിലാണ്. “ഇൻസ്റ്റഗ്രാമും ഓൺലിഫാൻസും തമ്മിൽ എന്താണ് വ്യത്യാസം.. പേരിൽ മാത്രമാണ് വ്യത്യാസമുള്ളത്.” ഇതായിരുന്നു ഡോജ് ഡിസൈനർ എന്ന പേജിൽ വന്ന ട്വീറ്റ്. സോഷ്യൽമീഡിയ പ്ലാറ്റ്‌ഫോമായ ഇൻസ്റ്റഗ്രാം മെറ്റയുടെ കീഴിലുള്ളതാണ്. എന്നാൽ ഓൺലിഫാൻസ് എന്നത് യുകെ അധിഷ്ഠിതമായി പ്രവർത്തിക്കുന്ന ഒരു പോൺ വെബ്‌സൈറ്റാണ്. ഡോജ് ഡിസൈനർ എന്ന ട്വിറ്റർ ഹാൻഡിലിൽ വന്ന ഈ ട്വീറ്റിന് താഴെ മസ്‌ക് പോസ്റ്റ് ചെയ്ത കമന്റാണ് ട്വീറ്റിനെ വൈറലാക്കിയത്. Pretty much എന്നായിരുന്നു മസ്കിന്റെ പ്രതികരണം. ഇതോടെ പോസ്റ്റ് ശ്രദ്ധേയമാകുകയായിരുന്നു.
ഇൻസ്റ്റഗ്രാം പോൺസൈറ്റിന് തുല്യമാണെന്ന വാദം ശരിവെക്കുന്ന തരത്തിൽ മസ്‌ക് പ്രതികരിച്ചതോടെ സക്കർബർഗുമായുള്ള പുതിയ സൈബർ യുദ്ധത്തിന് തുടക്കമിട്ടിരിക്കുകയാണെന്നാണ് ഇന്റർനെറ്റിലുയരുന്ന ചർച്ച. വിവാദത്തിന് കാരണമായ പോസ്റ്റും മസ്കിന്റെ പ്രതികരണവും ചുവടെ..
