മുംബൈ: ശ്രീരാമനും സീതയും ‘ ആദർശ’ ഭാര്യാ ഭർത്താക്കന്മാരെന്ന് പ്രശസ്ത ബോളിവുഡ് ഗാനരചയിതാവ് ജാവേദ് അക്തർ. സ്നേഹത്തിന്റെയും ഐക്യത്തിന്റെയും ഉത്തമ ഉദാഹരണങ്ങളാണ് ശ്രീരാമ ഭഗവാനും സീതാദേവിയുമെന്നും അദ്ദേഹം കൂട്ടിച്ചേർത്തു. മഹാരാഷ്ട്ര നവനിർമാൺ സേന നേതാവ് രാജ് താക്കറെ മുംബൈയിൽ സംഘടിപ്പിച്ച ദീപോത്സവ് പരിപാടിയിൽ സംസാരിക്കുകയായിരുന്നു അദ്ദേഹം.
” നമുക്ക് മുന്നിൽ ഒരുപാട് ദൈവങ്ങളുണ്ട്. എന്നാൽ ഉത്തമ ഭാര്യ-ഭർത്താക്കന്മാരെ കുറിച്ച് പറയുമ്പോൾ മനസിലേക്ക് വരുവന്നത് ശ്രീരാമ ഭഗവാനും സീത ദേവിയുമാണ്. ഇവരാണ് സ്നേഹത്തിന്റെയും ഐക്യത്തിന്റെയും ഉത്തമ ഉദാഹരണങ്ങൾ.” – ജാവേദ് അക്തർ പറഞ്ഞു.
ഹിന്ദുമതത്തിന്റെ സാംസ്കാരിക പ്രാധാന്യം ഊന്നിപ്പറഞ്ഞ അദ്ദേഹം രാമനും സീതയും ഹിന്ദു ദൈവങ്ങളും ദേവതകളും മാത്രമല്ലെന്നും ഭാരതത്തിന്റെ സാംസ്കാരിക പൈതൃകമാണെന്നും ചൂണ്ടിക്കാട്ടി. അഹിഷ്ണുത പുലർത്തുന്നവരിൽ നിന്നും വിഭിന്നമാണ് ഹിന്ദുക്കൾ. അവർ ഉദാരമനസ്കരും വിശാലഹൃദയവുമുള്ളവരുമാണ്. ഇതാണ് ഹിന്ദു സംസ്കാരം, ഇതാണ് നാഗരികത. ഈ രാജ്യത്ത് നമ്മൾ മാത്രമാണ് ശരി മറ്റെല്ലാവരും തെറ്റാണെന്ന് ഹിന്ദുക്കൾ കരുതാറില്ല, ഇത് നിങ്ങളെ ആരു പഠിപ്പിച്ചാലും തെറ്റാണെന്നും ജാവേദ് അക്തർ വിശദീകരിച്ചു.
