ലോകകപ്പിലെ പാകിസ്താന്റെ മോശം പ്രകടനത്തിൽ നായകൻ ബാബർ അസമിനെ വിമർശിക്കരുതെന്ന് ഷദാബ് ഖാൻ. ടീമിന്റെ മോശം പ്രകടനങ്ങളിൽ ബാബറിനെതിരെ രൂക്ഷ വിമർശനമാണ് ഉയരുന്നത്. ഈ സാഹചര്യത്തിലാണ് ബാബറിനെ പിന്തുണച്ച് വൈസ് ക്യാപ്റ്റൻ കൂടിയായ ഷദാബ് ഖാൻ രംഗത്തെത്തിയത്.
ടീമിന്റെ തോൽവികളുടെയും മോശം പ്രകടനത്തിന്റെയും ഉത്തരവാദിത്തം ക്യാപ്റ്റന്റെ ചുമലിൽ വയ്ക്കുന്ന സമീപനം മാറണം. കളിക്കളത്തിൽ ഒരാൾ മാത്രമല്ല ഉള്ളത്. ലോകകപ്പിലെ മോശം പ്രകടനത്തിന്റെ ഉത്തരവാദിത്തം എല്ലാവരുടേതുമാണ്. മികച്ച രീതിയിലാണ് ക്യാപ്റ്റനെന്ന നിലയിൽ ബാബർ ടീമിനെ നയിച്ചത്. എന്നാൽ താരങ്ങളുടെ വ്യക്തിഗത പ്രകടനങ്ങളിലെ പോരായ്മയാണ് ടീമിനെ നിരാശപ്പെടുത്തിയത്. ടീമിന് വലിയ സംഭാവനകൾ നൽകാനും എന്നിൽ അർപ്പിച്ച പ്രതീക്ഷയ്ക്കനുസൃതമായ പ്രകടനം പുറത്തെടുക്കാൻ എനിക്കും സാധിച്ചില്ല.- ഷദാബ് പറഞ്ഞു.
