ലോകകപ്പ് സെമിയിൽ കിവീസിനെ വീഴ്ത്തി ഇന്ത്യക്ക് വിജയം സമ്മാനിക്കുന്നതിൽ നിർണായക പങ്ക് വഹിച്ചത് മുഹമ്മദ് ഷമിയുടെ പ്രകടനമാണ്. വിരാട് കോലി, ശ്രേയസ് അയ്യർ എന്നിവർ സെഞ്ച്വറി നേടിയ മത്സരത്തിൽ ഷമി ഏഴ് വിക്കറ്റും സ്വന്തമാക്കിയിരുന്നു. 9.5 ഓവറിൽ 57 റൺസ് വിട്ടുകൊടുത്താണ് ഷമി ഏഴ് വിക്കറ്റ് വീഴ്ത്തിയത്. ഈ പ്രകടനത്തിന് പിന്നാലെ ഷമിയെ പ്രശംസിച്ചു കൊണ്ട് രംഗത്തെത്തിയിരിക്കുകയാണ് മുൻ പാക് താരം ഷൊയ്ബ് അക്തർ.
ലോകകപ്പിൽ മികച്ച തിരിച്ചുവരവാണ് ഷമി നടത്തിയിരിക്കുന്നത്. അത്ഭുതകരമായ രീതിയിൽ എതിർ ടീമിന് നേരെ പന്തെറിയാനുളള കഴിവ് അദ്ദേഹത്തിനുണ്ട്. സീം ബൗളിംഗ് കൊണ്ട് ശരിക്കും മായാജാലം സൃഷ്ടിക്കുന്ന താരമാണ് ഷമി. സെമി പോരാട്ടത്തിൽ മത്സരത്തിലെ താരമായി തിരഞ്ഞെടുക്കപ്പെട്ടതിന് പിന്നാലെ മുഹമ്മദ് ഷമിയെ പ്രശംസിച്ച് തന്റെ യുട്യൂബ് ചാനലിലൂടെയാണ് ഷൊയ്ബ് രംഗത്തെത്തിയത്.
ലോകകപ്പിൽ ഷമിയുടെ നാലാം അഞ്ചു വിക്കറ്റ് നേട്ടമാണിത്. ഇത്തവണത്തെ ടൂർണമെന്റിൽ മൂന്നാമത്തേതും. ഇതോടെ ലോകകപ്പ് ചരിത്രത്തിൽ ഏറ്റവും കൂടുതൽ അഞ്ച് വിക്കറ്റ് നേട്ടം സ്വന്തമാക്കിയ ബൗളറെന്ന നേട്ടം ഷമിയുടെ പേരിലായി.